Talisay ug MCWD nagkasinabot na
CEBU, Philippines – Ang kagamhanan sa Dakbayan sa Talisay ug Metropolitan Cebu Water District (MCWD) nagkasabot na alang sa pagpalambo sa serbisyo sa MCWD ngadto sa mga Talisaynon.
Giingong ang Dakbayan sa Talisay ug ang MCWD nagkasabot kini nga magbuhat og atabay ang MCWD diha sa mga lugar sa siyudad aron makuhaan og tubig nga masuplay ngadto sa mga Talisaynon. Si Mayor Gerald Anthony “Samsam” Gullas Jr. ug ang konseho sa Dakbayan sa Talisay nakigsabot sa MCWD pinangulohan sa ilang general manager nga si Stephen Yee niadtong Martes sa hapon.
Sayo pa, si Gullas nasagmuyo sa MCWD gumikan sa pipila ka higayon nga sila gipakyas niini. Ang Dakbayan sa Talisay usa sa mga gikuhaan sa MCWD og supply sa tubig.
Si Gullas nipadayag nga dili niya ipatigbabaw ang iyang kahiubos tungod kay dili usab siya buot nga mag-antos ang mga Talisaynon.
Si Gullas niklaro nga adunay sinemana nga pagbasa sa metrohan sa taga MCWD ug sa city hall sa tanang atabay nga makawot.
“Most importantly, unlike the Jaclupan facility, we have also agreed in the meeting that all new wells that MCWD will dig will be for the sole distribution in the city of Talisay,” tipik sa post ni mayor Gullas diha sa Facebook account.
Mahimo usab nga ang dakbayan mopahigayon og surprise inspection aron masiguro nga igo nga gidaghanon sa tubig nga makuha. Gimanduan na ni Gullas si Atty. Giovanni Sususco, city legal officer aron mapadali ang pagpirma sa Memorandum of Agreement (MOA). /BDB (BANAT NEWS)
- Latest
