Gidunggab sa truck boy atol sa birthday
CEBU, Philippines – Patay ang 36-anyos nga drayber human gidunggab sa iyang truck boy atol sa adlaw nga natawhan niini sa may Sitio Fatima, Tinaan, Dakbayan sa Naga niadtong Martes sa gabii tungod lang sa ilimnon nga makahubog.
Ang nakalas naila nga si Richard Elemino, lumad nga taga Toledo City ug temporaryong nagpuyo sa maong lugar.
Ang suspek mao si Raphy Legado, 25, truck boy sa biktima kinsa lumad nga taga Mabinay, Negros Oriental.
Matud ni Police Staff Sergeant Dionesio Cabotaje, desk officer sa Naga City Police Station, nga nakig-inom ang biktima sa suspek tungod kay nagselebrar kini sa iyang birthday. Dugang ni Cabotaje nga pauli na ang suspek sa ilang balay ug gibitbit niini ang bino hinungdan nga gisunod kini sa biktima ug didto nahitabo ang ilang mainiton nga lalis.
Sumala pa ni Cabotaje nga tungod sa mainiton nga lalis gidunggab ni Legado si Elemino sa liog dayon sibat.
Gitug-an ni Cabotaje nga ang si Legado dali kining nitahan sa buhatan sa kapolisan human sa nahimo niining krimen samtang ang biktima dali unta nga gidala sa Vicente Mendiola Center for Health and Infirmary apan gideklarar kini nga dead on arrival.
Ang kapolisan nag-andam na karon og kasong homicide batok ni Legado kinsa kasamtangan nga nagtingkagol sa prisohan. /GMR (BANAT NEWS)
- Latest
