Pusher napusilan; P20.4 milyones shabu nasakmit
CEBU, Philippines — Lalaki misulay og ilog og armas sa polis ang napusilan atol sa gipahigayon nga buybust operation sa Barangay Tisa Dakbayan sa Sugbo, samtang laing mga gidudahang bigtime drug pushers sab ang nasikop ug kapin P20 milyones nga gidudahang shabu ang nasakmit sa managlahing mga anti-illegal drugs operations sa kapolisan sa dakbayan.
Giila ang napusilan nga si Felipe Del Rosario Lauza, 29, nagpuyo sa maong lugar ug maoy target sa operasyon sa Labangon Police Station.
Matud ni Labangon Police Station Chief Police Captain Jonathan Dela Cerna nga atol sa operasyon nakabantay si Lauza nga dunay armas ang iyang buyer apan nakuptan kini dayon sa kamot.
Dihadiha mikisikisi kini ug giilog ang armas sa polis hangtud nga nibuto kini ug naigo si Lauza sa tuo nga paa, ayha pa kini nitahan.
Gidala sa tambalanan si Lauza, samtang nadakpan iyang kauban nga si Christine Maranga, 30 anyos nga taga Barangay Tisa.
Nakuha sa maong operasyon mao ang 70 gramos nga shabu kun mobalor ngadto sa P476 mil.
Samtang lain usab nga operasyon ang gipahigayon sa Guadalupe Police Station didto sa Sitio Capaculan Barangay Tisa Dakbayan sa Sugbo nadakpan ang usa ka Nicanor Cabornay, 52, nagpuyo sa maong lugar.
Matud ni Police Captain Joselito Marquez hepe sa Gudalupe Police Station nga si Cabornay usa ka regional level high value target kay sinaligan kini sa mga drug lords isip ilang bodegero ug tigapud-apod sa drugas ngadto sa nagkalain-laing area sa dakbayan.
Gawas nga siya maoy bodegero mamaligya usab kini og dili mo minus 100 gramos matag semana sumala pang Marquez.
Nakuha gikan kang Cabornay ang duha ka kilong gidudahang shabu nga mobalor P13.6 milyones.
Ang ikatulo nga operasyon gipahipahigayon sa Abellana Police Station sa dan Escario Barangay Kamputhaw Dakabayan sa Sugbo.
Usa ka Dexter Caballero, 46, taga dalan St. Jude sa Barangay Hipodromo ug si Winston Gacasan, 18 anyos nga taga dan Urgello Barangay Sambag 1 Dakbayan sa Sugbo.
Nakuha gikan sa duha ang gibanabanang 960 gramos nga gidudahang shabu nga mokantidad ngadto sa dul-an P7 milyones nga balor sa shabu. Ang duha gikonsiderar nga regional level HVT sa kapolisan.
Ang mga dinakpan pasakaan og kasong paglapas sa Republic Act 9165 sa Comprehensive Dangerous Drugs Act of 2002 Section 5 ug 11 tungod sa pagpamaligya ug paghupot og illegal nga drugas.
Samtang sa Mandaue City, nadakpan sa checkpoint sa dalan M. L. Quezon, Barangay Maguikay si Jose Niño Comodas, 25, taga Barangay Tinago sa Dakbayan sa Sugbo tungod sa paghupot og kalibre .9mm nga pistol nga puno sa mga bala nga way dokumento.
Sa pagrekisa kaniya nakuhaan kini og usa ka gramo nga gituohang shabu. /IBM (BANATNEWS)
- Latest