2,500 ka bata sa Cebu City apil sa Christmas party
CEBU, Philippines — Ang Cebu City Progressive Uptown Movement (CCPUM) ang nipahigayon sa ilang ika-9 nga Pasko sa Uptown Children's Grand Christmas Party human sa nilabay’ng tulo ka tuig.
Nikabat sa 2,500 ka bata nga nagpangedaron og unom ka tuig hangtud sa 11-anyos gikan sa 49 ka barangay ang nakabenepisyo sa maong proyekto. Ang Pasko sa Uptown gipahigayon diha sa Central Command (CentCom) sa Barangay Apas, Dakbayan sa Sugbo kagahapon.
Si Cebu City Vice Mayor Michael Rama kinsa maoy nag-umol sa CCPUM niadtong tuig 2007 nagkanayon nga ang maong proyekto alang gyud sa mga bata.
"Christmas is basically for children. Malipay man gani ang mga dagko, what more the children? So this event is really to make the children happy”, matud ni Rama.
Ang Pasko sa Uptown karon duna kini kalahian sa nilabay’ng mga tuig tungod kay karong tuiga gipangulohan kini sa mga pribadong sektor ubos sa tema nga “Nurturing the Future Through Private-Driven Governance”.
Giingong nikabat ngadto sa P1.5 milyones ang kinatibuk-ang budget sa maong proyekto diin gigamit kini sa pagpamalit og mga pagkaon ug t-shirts nga gipanghatag ngadto sa mga bata.
Sa maong budget, nikabat sa P500 mil ang gikan sa kagamhanan sa Dakbayan sa Sugbo ug P1 milyon gikan sa pribadong sector.
Matud sa CCPUM nga buot nilang makahatag og kalipay sa mga bata niining panahon sa pasko. /BDB (BANATNEWS)
- Latest
