Bag-ong sakop sa MCWD board itudlo ni Labella

CEBU, Philippines — Magtudlo si Cebu City Mayor Edgardo Labella og bag-ong miyembro sa Metropolitan Cebu Water District (MCWD) Board of Directors sa mosunod nga 30 ka adlaw.

Kini human giaprubahan sa Local Water Utilities Administration ang termination notice nga giisyu ni Labella niadtong Oktubre 15, 2019.

Gitangtang ni Labella sa pwesto sila si MCWD Chairman Joel Mari Yu; kanhi konsehal nga sila si Procopio Fernandez ug Augustus Pe Jr.; kanhi City Attorney Ralph Sevilla ug Atty. Cecile Adlawan tungod sa kadismaya sa mga konsumedor sa serbisyo sa MCWD.

Si Yu niluwat sa iyang pwesto pipila ka adlaw human gipagawas ang termination notice.

Samtang giingon ni Labella nga maghimo pa siya og mga konsultasyon alang sa iyang pagtudlo sa bag-ong MCWD Board.

“We will only limit to five. It’s good that there are many names,” sigun ni Labella.

Sa pikas bahin hingpit na nga giputol sa Kapitolyo ang kasabotan tali sa Manila Water Consortium Inc., sa joint investment sa bulk water supply sa Metro Cebu.

Napadala na sa Kapitolyo ang notice of termination ngadto sa MWCI niadtong Disyembre 10 nga gipirmahan ni Gob. Gwen Garcia.

Ang pagputol sa kasabotan tungod kini sa ubay-ubay nga kalapasan sa MWCI sa kontrata.

Ang kasabotan may kalabotan sa pagkuha og surface water sa Luyang River sa Lungsod sa Carmen. – Mary Ruth R. Malinao ug Le Phyllis F. Antojado/GMR

Grassroots sports program palambuon sa dakbayan

Giaprobahan na sa konseho sa Siyudad sa Sugbo ang ordinansa nga giduso ni Konsehal Eugenio Gabuya Jr. alang sa pagtukod og mga grassroots sports development program ingon man ang paghatag og pundo alang niini.

Ang ordinansa ni Gabuya nagtumong sa pag-umol sa mga batan-ong atleta sa siyudad alang sa pag-apil sa mga kompetisyon.

Nag-unang tumong ang pagbansay sa talento sa mga batan-ong atleta aron makabaton og de kalidad, abilidad, ug physiological-psychological nga potensyal aron maandam sila alang sa national ug international sports competition.

Tuyo usab niini nga mapalambo ang usa ka panghunahuna sa mga batan-ong atleta nga matawag nga “fit” ang usa ka tawo dili lang bahin sa lawas apan lakip ang determinasyon ug disiplina.

Ang programa itanyag nga libre alang sa mga partisipante o trainee nga taga Dakbayan sa Sugbo kinsa nag-edad og 6 ngadto sa 25-anyos ug himsog ug haum sa gipili nga programa sa sports o mga pagbansay samtang andam nga mahimong boluntaryo nga junior trainer sa iyang hilig sulod sa 40 ka oras matag tuig.

Ang dakung kalampusan sa Dancesport Grassroots Program sa siyudad nga gipaila ni Cebu City Sports Commission chairman Edward Hayco ug sa iyang asawa nga si Eleanor maoy sinugdanan sa grassroots sports program niadtong 1998. /GMR (BANATNEWS)