Business permit 2 ka tuig na

CEBU, Philippines — Gikompirmar ni Cebu City Mayor Edgardo Labella nga sugod sunod tuig balido na ang business permit sulod sa duha ka tuig.

Kini human giaprubahan sa konseho sa Siyudad sa Sugbo ang ordinansa nga nag-amendar sa Omnibus Tax Ordinance diin nagmando sa usa lang ka tuig nga validity period sa business permit.

“Well of course we have to implement that efficiently because that is one of our campaign agenda, campaign promise that is part of the ease of doing business to encourage our business men,” matud ni Labella.

Si Atty. Jared Limquiaco, officer-in-charge sa Business Permit and Licensing Office, niingon nga pareho ra ang bayranan sa buhis diin makapili kung quarterly o tinuig ba.

“Ang gi-extend kay ang validity sa permits, so ang taxes same ra gihapon, mahulog na pag-issue namo og permit ang validity kay two years na, so from 2020 to 2022,” matud ni Limquiaco.

Gipahibawo usab ni Labella nga dunay laing plano sa pag-usab sa tax code diin mahimo na nga mobayad sa mga tax fees o bayad sa regulatory fees sa mga accredited banks sa gobiyerno. /GMR (BANATNEWS)