Card gamiton sa pagplite sa CSBT

CEBU, Philippines — Gitinguha karon sa Kapitolyo ang pag-modernize na sa sistema sa Cebu South Bus Terminal (CSBT) diin gitan-aw ang pagpatuman og online ticketing.

Pinaagi sa maong sistema, mogamit na og cards ang mga pasahero nga mapalitan og load sa mga accredited nga tindahan dayon gamiton pagsakay ug pagkanaug kun diin ang plite magdepende sa destinasyon sa pasahero.

“Karon nangita ta og paagi nga subay sad kay duna may gipagawas nga memorandum circular ang LTFRB nga by 2020 modernization na gyud ta, ug usa na niini mao ang paggamit og card nga mahimo load-dan ug mao na to ang gamiton sa pasahero para magbayad sa ilang bayranan kun mosakay sila sa bus,” matud ni Gobernador Gwendolyn Garcia.

Ang maong pamaagi natan-aw nga solusyon aron dili motaas ang linya sa mga pasahero sa CSBT ilabi na kun rush hour ug peak season diin moabot na sa gawas ang linya.

Kun ipatuman kini, ang mga bus operators kinahanglan mabutangnan og pasilidad kun asa mamahimong makapa-load sa card ang mga pasahero. Una nga nakadawat og pagsaway ang CSBT atol sa Kalag-kalag niadtong Nobiyembre human nga gipatuman ang “no ticket no entry policy” sa terminal nga niresulta sa grabe kataas nga linya sa mga pasahero gawas sa terminal. –/GMR BANAT NEWS