P7 milyones shabu nasakmit sa mambaling

CEBU, Philippines – Dul-an sa P7 milyones ang kantidad sa gidudahang shabu nga motimbang sa usa ka kilo ug lima ka gramos ang nasakmit gikan sa 25-anyos nga si Lyndon Labajo Arante alyas Dondon nga nagpuyo sa Kabancalan 2, Bulacao, Siyudad sa Sugbo.

Kini atol sa buy-bust operation sa Drug Enforcement Unit sa Mambaling Police Station 11 sa may Avocado St., Barangay Mambaling, Cebu City alas 12:10 niadtong Martes sa kaadlawon.

Matud sa dinakpan nga igo lang siya gisugo paghatud sa maong drugas og wala niya damha nga polis na ang iyang gikatransakyon.

Si Arante gikatahong anaa sa drug watchlist high value target regional level ug kasamtangang gibalhug sa prisohan sa Mambaling Police Station 11 samtang pasakaan og kasong kalapasan sa Republic Act 9165 o ang Comprehensive Dangerous Drug Act of 2002.

Samtang nasikop ang upat ka pusher sa managlahing buy-bust operation sa kapolisan nga naglakip sa usa ka babaye sa Dakbayan sa Lapu-Lapu ug laing usa ang nadakpan sa Lungsod sa Cordova.

Si Police Major Narciso Abapo, hepe sa Presinto 2 sa Lapu-Lapu City Police Office, niila sa ilang nadakpan nga si Dino Cabahug Amores, 52-anyos, negosyante nga nagpuyo sa Sitio Looc, Barangay Maribago sa maong dakbayan.

Dugang nga nadakpan nga kauban ni Amores mao ang usa ka babaye nga giila nga si Deliza Horrido Nishida, 43-anyos, nga nagpuyo gihapon sa maong dapit ug nasakmit gikan sa maong mga dinakpan ang 13 ka gagmay nga pakete sa shabu nga nagkantidad og P12,240.

Sa Sitio Tribu, Barangay Suba-Basbas sa maong dakbayan nadakpan sab ang pusher og shabu nga giila nga si John Jestopher Cabillon Bacalso, 24-anyos, taga Sitio Kolo, Barangay Alegria sa Lungsod sa Cordova.

Nasakmit gikan sa maong dinakpan ang 10 ka gagmay nga pakete sa shabu uban sa P300 nga buy-bust money ug P200 nga salapi nga gituohan sa kapolisan nga halin sa gibaligya niining           shabu.

Sa Sitio Camolinas, Barangay Poblacion, Lungsod sa Cordova maoy nadakpan sa kapolisan nga gipangulohan sa ilang hepe nga si Police Lieutenant Jan Ace Elcid Layug ang giilang pusher nga mao si Jhakeson Baguio Lariosa, 37-anyos, nga taga Sitio Sambag, Barangay Pilipog sa maong lungsod.

Nasakmit nila ni Layug gikan sa maong dinakpan ang 37 ka gagmay nga pakete sa shabu uban sa P300 nga buy-bust money ug salapi nga P300. /GMR (BANAT NEWS)