Labing ubos P500T ihatag sa Kapitolyo sa barangay

CEBU, Philippines – Gawas sa tulda ug mono block chairs, ubay-ubay pa nga mga butang nga pangayooon sa mga barangay sa Probinsiya sa Sugbo ang dili aprobahan sa Kapitolyo.

Atol sa general assembly sa mga barangay kapitan sa probinsiya kagahapon, gipahibawo nga apil sa mga dili ihatag sa Kapitolyo ang mga computers, cellphone, laptops, handheld radio, printers, LCDs, CCTV installations, internet subscriptions/camera, office furniture ug fixtures, sporting goods o ekipo, musical instruments, sound system, sewing machine, wall ug stand fans, aircon, kitchen utensils ug uban pa.

Matud ni Garcia nga mga dagku nga proyekto ang ihatag sa Kapitolyo ngadto sa mga barangay nga maoy labing kinahanglan ug mas daghan ang mga makabenepisyo sama na lang sa pagsemento sa mga dalan, pag-ayo sa mga taytayan ug pagtukod og water system.

“Ang kaya sa inyong budget, kamo lang usa. Ang mga dagku nga gastuhonon ang probinsiya ang mogasto,” matud ni Garcia atubangan sa kapin usa ka libo ka kapitan nga nitambong sa kalihukan kagahapon sa IEC Pavilion.

Ang mga barangay nga mangayo og tabang sa Kapitolyo alang sa proyekto niini nga inprastraktura, mosumiter kini sa ilang barangay resolution ngadto sa Provincial Planning and Development Office lakip na ang program of works nga maoy i-subject sa validation.

“All requirements shall be subject to validation and amount of infra projects should be at least P500,000,” matud ni Garcia. Kinahanglan usab nga masumiter ang mga rekisitos nga kinahanglan nga dunay endorsement sa board member sa dili pa o inigka Enero 30, 2020.

Si Garcia nibutyag nga sa tibuok tuig 2018 niabot og P257 milyones ang nagasto sa Kapitolyo nga ayuda ngadto sa mga barangay alang sa pagpalit og mga tulda, mono block chairs, lamesa, IT equipment, furniture ug fixtures, uniforms ug uban pa.

Matud sa gobernador nga ang maong pondo mamahimo na unta makakonkreto og 21 ka kilometro nga provincial roads o 51 kilometro nga barangay roads.

Ang pagtakda og guidelines sa gobernador gihimo aron dili lang magpataka og pangayo ang mga barangay ngadto sa probinsiya ug maseguro nga ang ihatag nga tabang sa Kapitolyo mapaingon sa mga programa ug proyekto nga molungtad og dugay. /GMR (BANAT NEWS)