80 kilong drugas gisunog

CEBU, Philippines – Mokabat ngadto sa dul-an 80 kilos nga klase-klaseng illegal nga drugas nga naglakip sa shabu, marijuana, Nalbuphine Hydrochloride ug Cocaine ang gisunog kagahapon sa buntag sa pugon sa  buhatanan og semento diha sa Dakbayan sa Naga.

Ang pagsunog gipangunahan sa Philippine Drug Enforcement Agency 7, Philippine National Police, Regional Trial Courts ug gisaksihan sa mga opisyales sa local government units ug Governor Gwendolyn Garcia.

Moabot ngadto sa P194, 221,005.75 ang kinatibuk-ang kantidad sa maong mga illegal nga drugas nga gisunog.

Matud pa ni Director Wardley Getalla, Regional Director sa PDEA7, ang mga gisunog aduna nay court orders u gang uban niini nadesisyonan na. Gibutyag ni Getalla nga pagkakaron, aduna pay gihipos nga dili mominos 35 kilos nga nagkalain-laing illegal nga drugs diha sa ilang storage room nga gigamit pa isip mga ebidensya sa mga kaso.

Magpaabot na sab sila sa higayon nga adunay na kini court order aron ilaha na usab kining sunogon.

Ang maong pribadong kompaniya nga pabrika sa semento diha sa Naga mao pa lamang ang ilang ka partner sa pagsunog sa mga nasakmit nga illegal nga drugas  apan nagtinguha gyud silang makabaton og kaugalingong ekipo ang ilang buhatan para niini.

Dugang pa ni Getalla, ang pagsunog sa mga nasakmit nga ebidensya usa kini ka maayong panag-ingnan ug aron makita sa publiko nga hugot ang ilang kampanya batok sa illegal nga drugas ug mapapas ang mga pagdudang gi-recycle ra nila ang mga ebidensya.

Gitug-an ni Getalla, kasagaran sa mga nasunog nga mga drugas gikan sa PNP Crime Laboratory nga diin duna sab kaugalingong storage room para sa mga ebidensyang ilang nangasakmit.

Usa sa mga nisaksi sa kalihokan si Police Regional Office 7 Police Brigadier General Valeriano De Leon kinsa mibutyag nga aduna pay mga susamang mga kalihokan silang himuon sa umaabot nga mga adlaw.

Sumala pa nga dako ang tabang sa maong kompanya isip partner sa law enforcement agencies tungod kay libre ra ang pagpasunog ug kun adto kini himuon sa mga crematorim mahal kaayo ang bayad.

Samtang si Archbishop Jose Palma, sa Archdiocese of Cebu, mahinangpon sa pagsunog sa maong mga illegal nga drugas ug malaumon nga aduna pay mga mosunod sa maong kalihukan. /IBM (BANAT NEWS)