Kapitolyo nilapas na sa target
CEBU, Philippines — Nilapas na sa target collection ang Kapitolyo sa tuig 2019.
Target sa Kapitolyo ang P729.3 milyones apan sa buwan sa Oktubre pa lang niabot na og P740.4 milyones ang nakolekta.
Sa “collection efficiency record” sa Provincial Treasurer’s Office, niabot sa P176 milyones ang nakolekta sa Kapitolyo sa tax revenue gikan Enero hangtud Oktubre diin 118 porsyento ang completion niini human nilapas sa P149 milyones ang target. Ang tax revenues gilangkuban sa amusement tax, franchise tax, real property tax, tax on delivery trucks and vans, ug tax sa sand and gravel ug ubang quarry products.
Samtang sa non-tax revenue, 102 porsyento na ang nakolekta sa Kapitolyo o P52 milyones gikan sa target nga P51 milyones.
Kini naglakip sa mga regulatory fees, permit fees, rental sa mga properties sa probinsiya ug uban pa.
Matud ni Provincial Treasurer, Atty. Roy Salubre, nga ang “intensified collection” sa probinsiya maoy nakatampo sa pagsaka sa koleksyon.
Apan kun iapil ang Internal Revenue Allotment (IRA) nga makuha sa Kapitolyo matag tuig, wala pa makab-ot sa probinsiya ang total target niini nga P4 bilyones.
Sa pagkakaron anaa pa sa P3.4 bilyones ang pundo sa Kapitolyo apil na ang IRA sulod sa 10 ka buwan.
Positibo si Salubre nga molapas pa sa target sa Kapitolyo ang makolekta karong tuiga. GMR (BANATNEWS)
- Latest
