Palma naglaum Cardinal Tagle mahulipan dayun
CEBU, Philippines — Mahinangpon si Cebu Archbishop Jose Palma sa pagpili ni Pope Francis kang Cardinal Luis Antonio Tagle isip Prefect sa Congregation for the Evangelization of Peoples.
Ang pagtudlo kang Tagle gipahigayon niadtong Domingo sa Roma.
Si Tagle mohulip kang Cardinal Fernando Filoni kinsa gitudlo isip bag-ong Grand Master of the Order of the Holy Sepulcher.
Matud ni Palma nga atol sa pagkadawat sa maong balita, nakurat sila tungod kay dili pa sila dugay nagkita ni Cardinal Filoni atol sa pagbisita ni Pope Francis sa Thailand.
Dugang ni Palma nga daku og tahas si Tagle alang sa kinabuhing Kristohanon ug pagsangyaw sa evangelization sa daghan nga mga dioceses.
Sumala pa ni Palma nga sa dili madugay moadto naman ang Cardinal sa iyang bag-ong tahas hinungdan nga malaumon siya nga mahulipan usab kini sa dinalian tungod kay subsob naman ang ilang mga pagpangandam sa umaabot nga 500-years sa Kristiyanismo diin nakahan-ay na ang tanang kalihukan.
Ang Arsobispo nidasig ug niawhag sa tanang mga magtutuo nga ilakip usab sa ilang pag-ampo si Cardinal Tagle nga padayon kining mahimong inspirasyon sa mga tawo nga nanginahanglan ug gigutom sa Diosnon ug Kristohanon nga gugma.
Gibutyag sa Arsobispo nga aduna silay mga gipangsugyot nga pangalan para sa mohulip pero dili niya mabutyag kung kinsa ug niklaro nga giya na kini sa Espiritu Santo ug malipayon usab siya sa iyang pagdumala sa Sugbo. GMR (BANATNEWS)
- Latest
