Duha ka babaye dakpan tungod sa drugas

CEBU, Philippines — Duha ka mga babaye ang nasikop sa mga sakop sa Provincial Intelligence Branch atol sa gipahigayon nga buy bust operation sa may Leon Kilat St., Barangay Pahina Central ning Dakbayan sa Sugbo Biyernes.

Ang mga nasikop naila nga Joanna Saludar, 42, Provincial Level high value target ug si Belinda Montes, 30, puros taga Sitio Bato, Barangay Ermita

Nangulo sa maong operation si Police Lieutenant Col Marlu Conag, pangulo sa PIB uban sa pakigalayon sa 1st and 2nd PMFC  ug Philippine Drug Enforcement Agency-7.

Nasakmit gikan sa mga dinakpan ang mga pinutos sa ginadili nga drugas nga motimbang og 12 gramos nga mobalor og dul-an sa P82 mil.

Ang mga dinakpan gipanid-an pipila ka semana na ang nakalabay human adunay mga taho nga nadawat ang kapulisan nga namaligya sila og illegal nga drugas.

Gikatahong sagad sa ilang mga kustomer mga babayeng nagtrabaho sa mga balay kahilayan.

Samtang napulo ka mga motorista sab ang nadakpan  sa kapolisan sa Mandaue  City  Police Office (MCPO)  sa managlahing  anti-drug operations nga ilang gihimo.

Ang Presinto 1 sa MCPO nga gipangulohan ni Police Major Ramil Morpos naghimo og checkpoint sa dalan A.  del  Rosario  sa Barangay  Guizo  sa Dakbayan  sa Mandaue ug nadakpan ang upat ka mga motorista tungod sa paghupot og illegal nga drugas.

Samtang ang Presinto 2 nagpahigayon usab og checkpoint sa dalan Lopez Jaena nga gipangulohan sa ilang hepe nga si Police Major Melvin Fegarido ug

unom ka mga motoristang nakuhaan og gidudahang shabu ug mga bala sa armas nga kalibre 38.

Upat sab ka gidudahang durugista ang nasikop sa nagkalain-laing lugar sa Dakbayan sa Talisay niadtong Biyernes.

Sa operasyon diha sa San Roque Proper, Barangay San Roque duh aka tawo ang nasikop. Laing gidudahang drug pusher sab ang nasikop sa Zone 5, Barangay San Isidro.

Sunod girumbo sa kapolisan ang Sitio Mahayag, Barangay San Isidro  ug nadakpan ang laing tigpayuhot og illegal nga drugas. /IBM (BANATNEWS)