Fratman gipusil naangol

CEBU, Philippines — Kritikal ang kahimtang sa usa ka 19- anyos nga giingong fratman dihang kalit kining gipusil sa wala mailhing lalaki diha sa dalan Mabini Barangay San Roque Dakbayan sa Sugbo.

Giila ang biktima nga si Leo Macabudbus , lumad nga taga lungsod sa Carmen sa Bohol ug kasamtangan nga nagpuyo sa Katipunan Barangay Labangon, Dakbayan sa Sugbo.

Matud ni Waterfront Police Station chief Police Major Joemar Pomarejos naglakaw ang biktima kauban ang iyang duha ka higala nga sila Audric Labay ug Marjun Villareal paingon na unta uli. Wala mabantayi adunay duha ka lalaki ang nisugat ug kalit nga gipusil ang biktima.

Dugang pa ni Pomarejos nga sa ilang pakigsusi nasayran nga sa wala pa nahitabo ang insidente nipahimangno nang daan ang biktima sa duha niya nga higala nga kung magsul-ob siya og t-shirt sa Akhro kinahanglan nga modistansya sila.  Niadtong higayona giingong nagsuot ang biktima sa ilang fraternity shirt. Kahuman nga gipusil si Macabudbud dali nga nidagan ang duha ka suspect. Hinuon luwas ra ang duha nga higala nga kauban sa biktima.

Na-recover sa crime scene mao ang lima ka basiyo sa bala sa kalibre 45.

Naka angkon og samad pinusilan ang biktima sa lain lainh parti sa iyang babaw nga bahin sa lawas.

Wa sab matino kun fraternity related ang maong insidente sanglit dugay ng naghusay ang maong fraternity sa higpit niini karibal nga grupo kaniadto. /IBM (BANATNEWS)