Coast Guard nangrehistro na alang sa fluvial sa Sinulog
CEBU, Philippines — Karon pa lang nagsugod na og panawat ang Philippine Coast Guard og registration sa mga gusto moapil sa fluvial procession sa Sinulog 2020.
Kini ang gibutyag sa tigpamaba sa PCG-7, Lt. JG Michael Encina subay sa pagpangandam sa Sinulog 2020 diin ang PCG Central Visayas ang lead agency sa paghatag sa maritime safety ug security atol sa maong kalihukan.
Nagpahigayon na sila og pre-coordinating meeting uban sa maritime stakeholders ug maritime security law enforcement sama sa Police Regional Office 7, PNP Maritime Group, Philippine Navy ug kadagkuan sa Basilica Minore del Sto. Niño. Wala pa hinoon gibutyag kun hangtud kanus-a kutob ang pagpanawat og application apan gihimug-atan ni Encina nga sayo nila gisugdan aron ang katawhan masayud kun unsa ang mga gikinahanglan nga mga rekisitos aron makakuha sila og permit ilabi na sa safety requirements sa motor banca ug passenger vessels nga sakyan sa mga deboto.
Gilauman nga mas madugangan pa ang mosalmot nga mga barko sa fluvial procession sunod tuig ug tinguha nila nga mapatuman gihapon ang zero maritime casualty pinaagi sa pagpakig-alayon sa ahensiya nga may kalambigitan sa paghatag og maritime security ug safety measures.
Giangkon ni Encina nga hagit nila ang padayong pag-ugmad sa Cebu-Cordova Link Expressway apan napangitaan na hinoon na nila kini og solusyon.
Samtang ang kagamhanan sa Dakbayan sa Sugbo subsob na ang pagpangandam sa kapisatahan sa Señor Santo Niño sunod buwan.
Matud ni Konsehal Dave Tumulak, chairman sa committee on disaster risk reduction and management sa konseho sa dakbayan, nga nakaduso na sa ilang security preparation ang kapolisan ug ubang law enforcement agencies.
Makig-alayon sila sa mga habal-habal drivers, taxi drivers, jeepney drivers, security guards, parish security group ug uban pa nga magmabinantayon lakip usab ang mga barangay tanod.
Sumala pa ni Tumulak nga nakig-alayon usab sila sa nagkadaiyang tinuohan nga motabang sa pagbantay ug pag-monitor sa dakbayan tungod kay kung unsay mahitabo sa siyudad apil man ang tanan niini nga mga Sugbuanon. –/GMR BANAT NEWS
- Latest