Mga pasahero sa Talisay nireklamo sa cutting trip

CEBU, Philippines — Naabot na sa atensiyon ni Mayor Gerald Anthony “Samsam” Gullas, Jr. sa Siyudad sa Talisay ang giingong cutting trip sa rota sa mga trasyikol.

Si Gullas, sa iyang post diha sa social media nagkanayon nga daghan ang nipadangat kaniya og mensahe nga giingong adunay mga traysikol nga dili na moabot diha sa Barangay Cansojong ug Tanke tungod kay pakanaogon na lang diha sa Barangay Poblacion ang mga pasahero.

Ang uban usab dili na maabot sa Barangay Biasong tungod kay pakanaogon sa drayber ang mga pasahero diha sa Pooc.

Gumikan niini, si Gullas nisangon sa licensing office sa paghatag kaniya og lista sa gidaghanon sa mga traysikol nga adunay prangkisa.

Posibleng iimplementar ang estriktong paghatag og prangkisa sa mga traysikol diin aduna na unya’y mga guideline niini nga subayon.

Si Gullas buot makigtagbo sa mga kapitan aron masusi kong aduna bay asosasyon ang maong mga drayber ug nailhan ba usab nila kini.

Si Jonathan Tumulak, hepe sa City of Talisay-Traffic Operation and Development Authority gitahasan ni Gullas nga makig-estorya sa mga drayber sa traysikol kabahin sa maong problema.

Sa laing bahin, gipahibalo sa buhatan sa  City  Traffic  Management System  (CTMS) sa Dakbayan   sa Lapu-Lapu  nga walay pagahimuon nga pagsirado  sa mga dalan  karong adlaw nga Domingo atol sa pagahimuon nga Million Volunteer Run of the Philippine Red Cross sa Lapu-Lapu ug Cordova chapter.

            Adunay ipakatap nga traffic enforcer nga magbantay diha sa kadalanan. — /BDB BANAT NEWS