Lider sa mga drayber sa habalhabal gipatay

CEBU, Philippines — Gipusil patay ang usa ka lalaking gituohang ahente sa Central Command nga presidente sab sa asosasyon sa mga drayber sa habal-habal kagahapon sa kaadlawon diha sa Barangay Bulacao Dakbayan sa Sugbo, mga mamumuno giingong riding-in-tandem.

Giila ang biktima nga si Joel Apora,40, taga Barangay Kinasang-an Dakbayan sa Sugbo.

Matud ni Police Major John Kareen Escober nga paingon unta lakaw ang biktima uban sa iyang live in partner ug igo ra nihapit sa pagpalit og barbeque.

Apan samtang nagtalikod pa ang biktima kalit kining giduol sa wala mailhing lalaki ug gipusil kini.

Sa pakisusi sa kapolisan   sa Pardo Police Station personal nga pangbangi ang gitan-aw nga motibo ang pagpatay kang Apora.

Nasayran usab nga si Apora presidenti sa asosasyon sa habal habal sa Barangay Panagdait ug niadtong Miyerkules aduna kini nakalalis nga kaubang drayber.

Ang gikalalis niini nga drayber gikonsiderar nga person of interest.

Matud pa ni Che-che Malinis, usa sa mga kauban ni Apora sa ilang organisasyon maayong tawo ang namatay ug matinabangon.

Gitug-an ni Malinis, si Apora usa ka reservist sa Armed Forces of the Philippines. —/IBM BANAT NEWS