Laing maestro sikop sa buy-bust

CEBU, Philippines – Mokabat sa kapin P2 milyones nga balor sa shabu ang nasakmit sa mga sakop sa Provincial Intelligence Branch sa Negros Oriental Provincial Police Office sa buy-bust operation sa Brgy. Oikot, Dakbayan sa Bais sa maong probinsiya.

Giila ang dinakpan nga si Angelo Montiel Dy, 43, residente sa maong dapit ug gikonsiderar nga street level target sa Bais City Police Station, kinsa nakuhaan og gibanabana 300 gramos nga shabu. Samtang laing maestro ang nasikop sa buy-bust operation sa Purok 2, Graham Avenue, Booy, Dakbayan sa Tagbilaran, Probinsiya sa Bohol.

Giila ang dinakpan nga si Eufemio Bantugan, magtutudlo sa publikong tunghaan sa Dakbayan sa Tagbilaran.

Matud ni Police Lieutenant Colonel Oscar Boyles sa Tagbilaran City Police Station nga nitumaw ang pangalan ni Bantugan sa makadaghan na nila nga drug operation.

Tungod sa kaidlas taud-taud na usab nila nga gisuwayan og transaksyon apan gahapon lang kini sila nagmalampuson nga nakapalit kang Bantugan.

Gihimakak sa dinakpan nga namaligya usab siya ngadto sa mga estudyante apan sagad sa mamalitay niini igo ra siya kontakon.

Hinoon gikonsiderar kini nga high-value target (HVT) tungod kay usa siya ka maestro sa publikong tunghaan.

Nakuha gikan sa iyang posisyon ang gibana-bana nga 12 gramos ug mobalor sa kapin P80 mil.

Samtang laing HVT ug ang iyang kauban ang nadakpan sa buy-bust operation sa Sitio Ibo, Barangay Jaclupan, Dakbayan sa Talisay niadtong Martes sa gabii.

Ang subject sa operasyon mao si Wenie Cañedo, 36, samtang ang iyang kauban mao si Jovel Soquib, 39, nagpuyo sa nahisgutang lugar.

Ang mga sakop sa PIB sa Cebu Provincial Police Office maoy nihimo sa transaksyon batok ni Cañedo. Nakuha gikan sa mga dinakpan ang 12 ka gagmay ug duha ka medium nga pakete sa shabu.

Ang mga ebidensya nga nakuha nitimbang og 20 gramos nga adunay gibana-bana nga kantidad nga P136,000.

Usa sab ka HVT ang nasikop atol sa buy-bust operation sa mga sakop sa Toledo City Police Station sa may Sitio Loqui, Barangay DAS sa maong siyudad alas 5 pasado sa hapon niadtong Martes. Ang nasikop mao si Rodnie Cañete, 29, HVT watchlist provincial level, residente sa maong lugar. Nangulo sa maong operation mao si Police Lt. Col. Janette Rafter, hepe sa TCPS uban sa mga sakop sa Drug Enforcement Unit sa CPPO.  Nasakmit nila gikan kang Cañete ang mga pinutos sa ginadili nga drugas nga motimbang og 22 gramos nga mobalor og P150 mil, dul-an sa P1,700 nga gituohang halin, usa ka caliber pistol, usa ka magazine, ug unom ka bala. (/GMR)(BANAT NEWS)