Unom ka polis gitaktak sa PRO-7

CEBU, Philippines — Unom ka mga police ang gitaktak na sa serbisyo tungod sa nagkalainlaing kasong adminstratiba nga ilang giatubang diha sa Police Regional Office 7.

Ang resulta sa imbestigasyon sa ilang mga kaso giduso na diha sa buhatan ni Police Brigadier General Valeriano de Leon gikan sa Regional Investigation and Detective Management Division (RIDMD7) ug girekomendar silang taktakon sa serbisyo tungod sa grave offense.

Matud pa nga napadalhan na og pahibalo ang maong mga polis aron sila  makaapelar, apan wala sila mosanong.

Giila ang mga polis nga sila Police Master Sergeant Jerry Macabudbud nga sakop sa Bohol Provincial Police Office, Corporal Raymonito Panoh Mesa sa Cebu City Police Office ug lima ka police nga nag ranggo’g Patrolman nga silang Joseph Sala Tabotabo sa CCPO, Frances Dinglasa Maucesa sa CCPO, Edmund Barry Tabar Pizarra sa Mandaue City Police Office, Castor Garcia ug Jobie Antipolo nga pulos taga CCPO. Ang pito katausang nadestino sa Regional Personnel Holding and Accounting Unit (RPHAU) samtang nagpadayon ang imbestigasyon sa ilang kasong adminstratiba.

“They failed or maybe they don’t intend to appeal anymore their administrative case after repeated notices to do so. So, I signed their dismissal papers from the service last week,” matud pa ni De Leon.

Subay niini, gikanselar sab ang ilang mga benepisyo human nga gipirmahan na ni De Leon ang ilang dismissal from the service order.

Si De Leon miingon nga dili niya dapigan ang mga badlungong polis sa PRO7.

“I will not think twice to sign your dismissal order if you are found guilty or you continue your illegal activities such as drugs and other criminal acts. Policemen like you have no place in the organization,” dugang ni De Leon.

Gibutyag usab ni PRO7 Deputy Regional Director for Administration Police Brigadier General Ildebrande Usana nga ang maong mga polis nakasohan panahon pa ni Police Brigadier General Debold Sinas nga kabahin sa internal cleansing sa kapolisan.

Matud ni Usana magsilbi unta kining leksyon sa mga polis.

Samtang laing polis sab nga nadestino sa Pari-an Police Station sa Cebu City ang nakasohan og administratiba human kini nakuhaan og hulagway sud sa buwangan sa Carlock , Barangay San Nicolas Dakbayan sa Sugbo.

Matud pa ni Parian Police Station Chief Police Captain Armado Labora nga polis niya ang nasakpan nag ranggo pag Staff Sergeant.

Dugang pa ni Labora nga posibli nga natintal ang maong police nga manugal nga naatol lang usab nga naa laing personnel nga nakakita kaniya nga naa sa sulod sa buwangan.

Apan matud pa kusganong mihimakak ang maong polis sa pasangil nga nagsugal siya niadtong higayona kay igo ra siya naghatud og warrant of arrest sa lugar kay dunay nakatug-an kaniya nga naa sa buwang ang subject sa ilang warrant. /IBM (BANATNEWS)