Suki sa carcar lechon namalik na

CEBU, Philippines — Mapasalamaton si Carcar City Mayor Mercy Apura sa katawhan tungod kay nibalik na ang mga mamalitay sa ilang lechon human kini nakontrobersiya ug nag-trending sa social media niadtong nilabay nga mga buwan.

Matud ni Apura nga padayon ang ilang monitoring karon sa mga stalls sa merkado sa dakbayan diin dili lang ang mga inasal apan tanan gyud nga mga tinda kung nisunod ba kini sa mga balaud nga ilang gipatuman.

Dugang pa sa mayor nga kung aduna silay masakpan na usab unya nga mga badlongon nga manindahay dili gyud siya magduha-duha sa pagpahamtang og silot ug sa pagpasira sa tindahan.

Gitug-an ni Apura nga sa pagkakaron padayon ang ilang imbentaryo sa tanang mga tindahan sa merkado kung nituman ug nisunod ba kini sila sa mga rekisitos nga gihatag sa kagamhanan sa siyudad.

Ang mayor mahinangpon nga nipahibalo nga nibalik na usab karon ang mga mamalitay sa ilang inasal human sa kontrobersiya diin mapasalamaton siya nga nakasabot ra usab ang mga mamalitay sa mga problema nga ilang nasugatan.

Ang mayor nidasig sa katawhan nga mopalit gihapon sa ilang inasal kay lamian kini kaayo ug segurado siya nga wala nay mga badlongon nga manindahay niini karon. GMR (FREEMAN)