Mga barko wa gipabiyahe

CEBU, Philippines — Gatosan ka mga pasahero ang na-stranded sa pantalan sa Siyudad sa Sugbo ug uban pang mga pantalan sa Central Visayas human tanang biyahe sa barko gisuspenso tungod sa bagyong Tisoy.

Naabtan sa Banat News ang pipila ka mga pasahero nga naglingkod ug nagtapok gawas sa pantalan sa Cebu City, silang tanan nagpaabot kun kanus-a mabalik sa normal ang biyahe.

Sagad sa mga pasahero nga na-stranded manguli og Mindanao, Leyte, Bohol ug uban pa.

Si Resin Santos sa pagkutlo ning maong balita niadtong Sabado pa sa gabii pa naabot sa Pier 3 ug gikatakda untang molahos sa Ormoc City sakay og fastcraft niadtong Domingo sa buntag  apan walay gipalawig tungod sa bagyo.

Kay wala siya’y kaila sa Cebu nagpabilin siya sa Pier 3 ug magpaabot kun kanus-a nga makalarga. Problema niya karon ang budget ilabi na sa pagkaon.

“May unta og naa puy gamay nga ihinabang pud namo nga makakaon pa pud mi labi ng uban diri nga wa pud gyud intawon. Mao naa unta naay motabang namo pud nga maka-survive kami nga until naa nay barko nga moabot,” ni Santos pa.

Si Rowel Reducto mouli unta og Cagayan De Oro usa sab sa natanggong, tungod kay layo ang Balamban ug doble na ang gastos gipili niyang anha nalang magpaabot sa Pier 3.

“Maghuwat nalang gyud mi ani kay alanganin naman sad kaayo among kwarta og mouli pami, magastuhan naman pud mig maayo,” ni Reducto pa.

Samtang dunay say mga nagpa-refund ug nagpa-rebook sa ilang tickets karong gabie sa panghinaot nga makabiyahe na sila pabalik sa ilahang lugar.

Ang tigpamaba sa Philippine Coast Guard(PCG)-7 LT. JG Michael Encina miasoy makig-alayon sila uban Coast Guard Auxiliary aron makatabang sa mga na-stranded nga mga pasahero.

“Tayo po mismo sa Coast Guard makikipag-coordinate katulong ang Coast Guard Auxiliary natin para kahit po in our own makapagbigay po tayo sa mga stranded passenger. But then again, ini-inform din naman natin sila na with this upcoming weather disturbance ‘yung suspension po ng trips ng sasakyang pandagat will be prolonged, so ang ginagawa po natin ini-encourage po natin sila na umuwi sa kani-kanilang mga tahanan at antayin ang pag-resume ng mga biyaheng na-suspend,” matud ni Encina.Base sa talaan coastguard ,  468 ka mga pasahero ang na-stranded, 78 rolling cargoes, 71 passenger vessel, 45 motorbanca ang wala palargaha.

Giawhag sab ang mga mananagat nga dili gayud mopalawod karong mga panahona.

Tungod usab sa bagyo nangatanggong sab sa pipila ka pantalan sa probinsya ang mga pasahero sama sa Hagnaya Port  dunay 22 ka pasahero;  sa Toledo 290, Taloot Argao 5 ka pasahero kagahapong adlawa.  IBM (FREEMAN)