75-anyos patay human mabanggai og bus

CEBU, Philippines — Patay ang usa ka 75-anyos nga lalaki human ang iyang gimaneho nga motorsiklo aksidente kining nabanggaan sa usa ka bus diha sa Barangay Perrelos, Dakbayan sa Carcar kagahapon sa buntag.

Ang biktima mao si Trinidad Perez, minyo, residente sa maong lugar ug drayber sa nahisgutang motorsiklo.

Samtang ang drayber sa bus mao si Jeodines Dela Peña, 27-anyos, minyo, taga Barangay Abaob, Lungsod sa Argao.

Matud ni Police Corporal Argie Noel Espinosa, desk officer sa Carcar City Police Station nga gikan sa balay ang biktima ug padulong kini diha sa highway samtang ang bus nagbiyahe padulong sa Dakbayan sa Sugbo.

Giingong ang biktima wala makabantay nga adunay bus hinungdan nga nadasmagan ang gimaneho niining motorsiklo.

Matud ni Espinosa nga nalagpot diha sa karsada ang biktima hinungdan nga nakabaton og grabeng kadaot sa lawas ug daling gidala diha sa tambalanan sa siyudad apan gideklara kini sa doktor nga patay nga naabot sa tambalanan.

Dugang ni Espinosa nga si Dela Peña gitanggong kini diha sa detention cell sa Cacar City Police Station. (/BDB)(BANATNEWS)