Nanunggab, nangilog og traysikol nadakpan

CEBU, Philippines — Natingkagol sa detention cell sa Talisay City Police Station ang usa ka 23-anyos nga lalaki kinsa giingong nanunggab ug nangilog og traysikol human kini nasikop niadtong Sabado sa gabii diha sa Barangay Dumlog, Dakbayan sa Talisay.

Ang suspetsado mao si Gerald Bangcat, nagpuyo diha sa Sitio Uldog, Barangay Poblacion sa nahisgutang siyudad.

Ang biktima sa pagpanunggab mao si Gilbert Miculob, 27-anyos, residente usab sa Barangay Poblacion. Gikataho nga si Bangcat ug Miculob nagkaaway kini ug sa maong panag-away gidunggab ni Bangcat si Miculob.

Human sa hitabo nisuway sa pagsibat ang suspetsado diin nasugatan niini si Romilo Mag-aso, 50-anyos nga nagmaneho sa iyang traysikol.

Giingong giilogan sa suspetsado sa iyang traysikol si Mag-aso apan demalas kay dili makamao nga momaneho si Bangcat hinungdangt nikanaog kini ug nidagan na lang pahilayo sa lugar.

Apan ang mga sakop sa City of Talisay-Traffic Operation and Development Authority (CT-TODA) ang nakadawat sa maong alarma ug nigukod sa suspetsado ug nasikop kini.

Ang biktima dali usab kining gidala diha sa tambalanan. (/BDB)(BANATNEWS)