Ubay-ubay ang mga pasahero nga natanggong sa Hagnaya Port sa Lungsod sa San Remigio nga buot unta motabok sa Isla sa Bantayan nunot sa pagsuspenso sa mga biyahe barko sugod kagahapon sa buntag tungod sa bagyong Tisoy.
Jaypee P. Lao/GMR
Klase sa amihanan, barko suspendido
Le Phyllis F. Antojado, Romeo T. Limpangog (Banat) - December 2, 2019 - 12:00am

CEBU, Philippines — Suspendido ang klase sa mga lungsod ug dakbayan sa amihanang bahin sa lalawigan sa Sugbo tungod sa bagyong Tisoy karong adlawa.

Si Neil Sanchez, pangulo sa Provincial Disaster Risk Reduction and Management Office, nagakanayon nga subay sa kamanduan ni Gob. Gwendolyn Garcia walay klase sa dili mominus 15 ka lungsod ug dakbayan apil na ang mga isla sa amihanang bahin sa lalawigan nga maoy maapektohan sa bagyo.

Walay klase sa Bantayan Island nga gilangkuban sa Lungsod sa Santa Fe, Bantayan ug Madridejos; Daanbantayan, Medellin, San Remigio, Tabogon, Tabuelan, Borbon, Carmen, Catmon, Dakbayan sa Danao, Camotes Island, Lungsod sa Asturias, Tuburan, Sogod ug Dakbayan sa Bogo.

Suspendido niini ang kindergarten, pre-school ug elementarya.

Giawhag ni Sanchez ang mga lokal nga kagamhanan nga mohimo og “pro-active measures” isip pagpangandam sa bagyo. Matud niya nga dili na angay maghuwat nga mas mograbe ang panahon mao nga iyang abiso nga kun mahimo, mas maayo nga mohimo na og mga preventive evacuation sa mga lugar o dapit mga duol sa baybayon o kadtong peligro sa baha ug pagdahili sa yuta.

Karong adlawa gikatakda nga magtigum ang cluster sa PDRRM Council alang sa dugang aksyon nga himoon kalabot sa bagyo.

Samtang higpit karon nga gibantayan sa City DRRMO sa Dakbayan sa Lapu-Lapu ang mga biyahe sa mga motorbanca nga pasaheroan nga paingon sa Isla sa Olango gumikan sa bagyong Tisoy.

Nunot niini daghan sa mga pasahero nga mopaingon unta sa Lalawigan sa Bohol ang wala mahinayon sa ilang pagbiyahe nunot usab sa gipahibawo sa Philippine Coastguard alang sa temporaryo nga suspensiyon sa paglawig sa tanang matang nga sakyanan sa kadagatan sugod sa alas 10:50 kagahapon sa buntag.

Si Francisco Suelto nga kuyog sa iyang pamilya nga mobiyahe unta paingon sa Tubigon, Bohol ang namauli na lang sa ilang panimalay sa Tugbongan, Lungsod sa Consolacion.

Ang temporaryo nga pagsuspenso sa mga biyahe sa tanang matang sa sakyanan sa kadagatan paingon sa Bohol nunot usab kini sa giluwatan sa PAGASA nga Tropical Cyclone warning signal number 1 nga niepekto sa Catanduanes, Albay, Sorsogon, Camarines Sur, Masbate nga naglakip usab sa Burias ug Ticao Island, Samar, Northern Samar, Eastern Samar, Biliran, Camotes Island ug Leyte.

Matud sa PAGASA nga dugang maapektohan sa maong bagyo ang kalungsuran sa Lalawigan sa Sugbo nga naglakip sa Asturias, Bantayan, Dakbayan sa Bogo, Borbon, Carmen, Catmon, Daanbantayan, Dakbayan sa Danao, Madridejos, Medellin, Pilar, Poro, San Francisco, San Remigio, Santa Fe, Sogod, Tabogon, Tabuelan, Tuburan ug Tudela.

Ang mga molupyo sa maong dapit higpit nga gipahimangnoan tungod sa kusog nga uwan nga gidala sa bagyong Tisoy nga mao unya ang mahimong hinungdan sa mga pagbaha o pagdahili sa yuta. /GMR (BANATNEWS)

TYPHOON
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with