Maestro sikop sa Drug Bust
CEBU, Philippines — Usa ka 40-anyos nga magtutudlo sa pampublikong tulonghaan sa lungsod sa Dalaguete ang nasikop atol sa hiniusang buy bust operation sa kapulisan sa Dalaguete ug Alcoy diha Jose Rizal Street, Barangay Poblacion sa Dalaguete kagahapon sa buntag. Ang nasikop mao si Roy Osorio Ysao, public school teacher sa high school ug kanhi school head sa usa ka pribadong tunghaan sa maong lungsod.
Matud pa ni Police Staff Sergeant Bricel Ricaborda, Assistant Investigator sa Dalaguete Police Station, nakigalayon kanila ang Alcoy Police Station human nga duna silay dinakpan sa illegal nga drugas nga mitug-ang si Ysao ilang napalitan og illegal nga drugas.
Tungod niini gilusad ang operasyon pinangulohan sa ilang hepe Police Lt. Col. Juan Byron Leogo hinungdan sa pagkasikop sa maestro.
Sumala pa ni Ricaborda, taod-taod na nila gipanid-an si Ysao, apan naglisod sila kay tago kaayo kini sa iyang modus.
Gitug-an ni Ricaborda, base sa pangangkon sa maong magtutudlo, sa Dakbayan sa Sugbo kini mokuha og supply alang sa personal nga gamit ug sa pipila ka mga higala.
Dul-an sa P3 mil nga balor sa drugas ang nasakmit gikan kang Ysao lakip usab ang buy bust money.
Samtang laing operasyon nga gipahigayon sa Pardo Police Station didto sa Sitio St Jude Barangay Bulacao Dakbayan sa Sugbo nadakpan si Jose Andrey Abelgas, 19 anyos nga taga Sitio Tupaz Barangay Sawang Calero ug usa ka 15 anyos nga lalaki nga pulos gikonsidera nga HVT sa San Nicolas Police Station, Mambaling Police Station ug Pardo Police Station.
Nakuha gikan sa ilang posisyon ang dul-an 30 gramos nga shabu kun mobalor ngadto sa kapin 200 mil pesos.
Ang tulo ka dinakpan magatubang kini sa kalapasan sa Republic Act 9165 kun Comprehensive Dangerous Drugs Act of 2002 Section 5 ug 11 kun pagkupot ug pamaligya og illegal nga drugas.
Sa laing bahin si Cebu City Police Office Officer in Charge Police Colonel Geovanie Maines gustong palawman ang intel gathering batok niini sa illegal ga drugas.
Kini human nga adunay kapin 300 kilos ang nasakmit sa kaulohan nga gituohan nga ang uban niini dalhon paingon dinhi sa Central Visayas. Matud niya dili kini unang higayon nga adunay nasakmit nga drugas sa laing rehiyon nga paingon dad-on dinhi sa Sugbo.
Usa na niini mao ang pagkakuha sa drugas ngadto sa Probinsya sa Samar pipila ka bulan na ang nakalabay. – BANAT NEWS
- Latest