Pagbisita sa Santo Papa sa 2021 hanap na

CEBU, Philippines — Hanap na ang kahigayunan nga si Pope Francis makabisita sa Pilipinas sa 2021 subay sa pagsaulog sa ika-500 ka tuig sa Kristiyanismo.

Matud ni Cebu Archbishop Jose Palma nga nakahigayon siya sa pagpakigestorya sa Santo Papa kabahin sa kalihukan sa 2021 atol sa bag-ohay nilang pagbisita nila sa Thailand.

Sumala pa sa Arsobispo nga dili nalang sila molaum nga mobisita ang Santo Papa sa Pilipinas sa 2021 tungod kay bisan sa Argentina nga adunay daku usab kaayo nga importante nga kalihukan sa 2021 dili gihapon makabisita si Pope Francis bisan kung lugar kini nga iyang gigikanan.

Dugang ni Palma nga ila nalang sabton ang kapuno sa schedule sa Santo Papa diin base sa pagpasabot niini daghan pa nga mga lugar ang nagpaabot nga mabisitahan niini.

Ang Santo Papa kung kahinumduman nakabisita na sa Pilipinas niadtong 2015 diin iyang gibisita ang mga biktima sa bagyong Yolanda sa Tacloban City. (Rowena D. Capistrano/GMR)

Barko sa Danao Port hayan kasohan

Posibleng mag-atubang og kasong kriminal ang usa ka kompaniya sa barko nga nagbiyahe sa Dakbayan sa Danao padulong sa Isla sa Camotes.

Kini human nga nasayran sa Kapitolyo nga padayon gihapon ang pagkolekta sa P20 nga lounge fee sa mga pasahero gawas sa P5 nga kolektahon sa Cebu Port Authority (CPA) isip terminal fee.

Atol sa tigum nga gipatawag ni ni Gob. Gwendolyn Garcia ug Kong. Vincent Franco “Duke” Frasco, nisaad ang tagdumala sa Jomalia Shipping nga tangtangon na ang maong bayranan.

Si Frasco ang unang niduso sa tinguha nga wagtangon ang maong lounge fee tungod kay bug-at na kini alang sa mga pasahero nga mopadulong sa Isla sa Camotes.

Apan nasuta sa mga personnel sa Provincial Environment and Natural Resources Office atol sa test-buy nga padayon gihapong nangolekta og P20 nga lounge fee diha sa mall kilid sa Danao Port.

Si Atty. Rory Jon Sepulveda, consultant sa Kapitolyo, nagkanayon nga mamahimong mopasaka og kasong kriminal ug sibil ang Kapitolyo kun padayon gihapon ang pagkolekta niini. (/GMR)(BANATNEWS)