18 sa Lapu-Lapu ch positibo sa drug test

CEBU, Philippines — Hayan matangtang sa trabaho ang 18 ka job order nga kawani gikan sa nagkalainlaing departamento sa kagamhanan sa Dakbayan sa Lapu-Lapu.

Kini human nagpositibo sa gihimong kinalit nga drug test sa City of Lapu-Lapu Office for Substance Abuse Prevention nga gipangulohan ni Gary Lao.

Liboan ka kawani ang gipaubos sa random drug test isip pagtuman sa executive order ni Mayor Junard “Ahong” Chan aron mahimong drug-free workplace environment ang mga buhatan sa kagamhanan sa dakbayan.

Angg kinalit nga drug test nagsugod niadtong Hulyo 29 hangtud niadtong Nobiyembre 22 diin 17 ka buhatan sa kagamhanan sa dakbayan ang naapil na niini.

Kini sama sa Office of the Mayor, Local Disaster Risk Reduction and Management Office, City Traffic Management System, Material Recovery Facility Office, Home Care Office, ug uban pa.

“Whether they like it or not, they have to submit themselves for a drug test,” matud ni Lao.

Matud ni Lao nga kadaghanan sa nagpositibo sa drug test mga JO nga mga personnel.

Dugang pa ni Lao nga ilang ipadayon ang random drug test ngadto sa nagpabilin pa nga mga buhatan sa kagamhanan sa dakbayan.

“Before we conduct our drug test, our office conducted first an information drive ana. Before ta mag-start sa drug test, mag-conduct sa mi og mga 30 minutes seminar,” dugang ni Lao.

Samtang mokabat sa P1.5 milyones ang gigahin ni Chan sa 30 ka barangay sa Dakbayan sa Lapu-Lapu diin gipanghatag kini atol sa katapusang adlaw sa kalihukan sa Drug Abuse Prevention and Control Week niadtong Sabado.

Gikuha ang maong gahin ubos sa Barangay Anti-Drug Abuse Council (BADAC) sa dakbayan.

Ang 30 ka barangay nagkahiusa usab sa pagtambong sa kalihukan sukad sa pagbukas niini sa unang adlaw niadtong Nobiyembre 17 ug natapos niadtong Nobiyembre 23 nga may tema nga “Katarungan Para sa Kalusugan, Kalusugan Para sa Katarungan”.

Ang matag barangay nakadawat og P50,000 nga financial assistance ubos sa BADAC alang sa ilang pagplano ug pagpasiugda og mga programa nga naglambigit sa pagsumpo sa ilegal nga drugas sa ilang dapit.

Sa 30 ka barangay sa dakbayan, bugtong ang Barangay Caohagan sa Isla sa Olango lang ang nakadawat og dugang P50,000 ug nahimo kining P100,000 nga financial assistance nga ilang nadawat nunot usab sa pagdeklarar usab niini nga drug-free. /GMR (BANATNEWS)