Yangongo sa sidewalk vendors gibasura
CEBU, Philippines – Ang Cebu City Legal Office sa Dakbayan sa Sugbo gipangulohan ni Atty, Rey Gealon nirekomendar ngadto kang Mayor Edgardo Labella nga dili tugotang makabalik sa pagpaninda ang mga vendor diha sa side walk sa N. Bacalso, Avenue tungod kay kalapasan kini sa Department of Interior and Local Government (DILG) Memorandum Circular 2019-121.
Ang maong pamahayag sa CLO tubag kini sa suwat sa United Small Vendors and Traders of Cebu City.
Ang mga vendor nihangyo nga makatinda sulod sa 12 ka oras gikan sa alas 6:00 sa buntag ngadto sa alas 6:00 sa gabii ug tugotan sila nga makabaligya ug lain-lain nga produkto ug mahimo ang ilang sakop sa banay makabaligya o mobantay kong wala ang tag-iya.
Ug kong tugotan sila nga makabaligya mohatag sila og arkabala nga P300 matag buwan.
Apan matud ni Gealon nga tungod sa maong memorandum sa DILG dili sila makahatag og pagtugot sa mga manindahay sa sidewalk nga mobalik tungod kay kalapasan kini sa balaod nga giimplementar sa DILG.
Si Gealon nagkanayon nga nakasabot sila sa tinguha sa mga manindahay nga mobalik sa ilang naandan nga pwesto alang sa ilang panginabuhian apan ang ilang buhatan dili usab makatugot nga mosukwahi sila sa nalatid sa balaod. (/BDB)(BANAT NEWS)
- Latest