Mga mamumuo niawhag sa DOLE iresolba na ang labor case
CEBU, Philippines — Nagpahigayon og lihok protesta ang Alyansa sa mga Mamumuo sa Sugbo (AMA Sugbo) Kilusang Mayo Uno (KMU) diha atubangan sa buhatan sa Department of Labor and Employment(DOLE)-7 aron sa pagpaabot sa panawagan nga resolbahon na ang labor case nga nag-ung-ong sa maong buhatan.
Matud ni Mistaha Villarmero, tigpamaba sa AMA Sugbo KMU nga ang pagbalik sa mga mamumuo sa DOLE-7 kini aron ipadangat ang yangungo nga unta hatagan na og pagtagad ang kaso sa mga contractual worker nga dugay na nga pending sa nahisgutang ahensiya sa gobiyerno.
Gibutyag ni Villarmero nga ang mga mamumuo padayon nga nagsige og balik sa pag-follow-up aron mapaspas ang pagdesisyon sa maong mga kaso.
Ang maong mga kaso giingong aduna na kini desisyon sa regional director nga kinahanglang i-regular na sila sa ilang direct employer tungod kay nakita diha sa inspection report nga nag-engage og illegal laboring contracting ang maong mga kompaniya. Matud usab ni Villarmero nga hangtud karon wala pa matuman ang maong desisyon ug gani ang ubang mga mamumuo gipangtangtang na kini sa ilang trabaho.
Si Villarmero nagkanayon nga wala nihatag og rason ang ahensiya sa kalangay sa pagresolbar sa mga kaso apan giingong naa na kini sa secretary of labor.
Kuyog sa AMA Sugbo KMU ang mga trabahante nga gikan sa nagkalain-laing kompaniya. BDB (BANATNEWS)
- Latest