Dagan sa trapiko diha sa CSCR gilaumang mohuot
CEBU, Philippines — Gipahimangnoan sa pangulo sa City of Talisay-Traffic Operation Development Authority (CT-TODA) ang katawhan nga kong walay importante ang lakaw karong adlawa mas maayo nga mopuyo lang una sa ilang panimalay.
Kini human nga iyang napanglantawan nga adunay mahitabong paghuot sa dagan sa trapiko diha sa Cebu South Coastal Road (CSCR)) karong hapon.
Matud ni Jonathan Tumulak nga kong dili man gani kapugngan ang paglakaw mas maayo nga himuon kini og sayo tungod kay sa alas 12:00 sa udto siradohan ang usa ka lane sa nahisgutang karsada aron hatagan og higayon ang pagpahigayon sa “torch relay” sa Philippines 2019, 30th Sea Games diin matapos ang maong kalihukan sa alas 7:00 sa gabii.
Ang lane nga paingon sa Siyudad sa Sugbo himuon kini og two way lane ug ang usa ka lane maoy siradohan.
Matud usab ni Tumulak nga ang pagsirado gikan sa eskina SM Seaside paingon sa taytayan nga boundary sa Dakbayan sa Talisay ug Sugbo.
Hinuon adunay mga personnel sa CT-TODA ang ipakatap nga mo-assist sa pagmando sa dagan sa trapiko. Gihangyo usab ni Tumulak ang mga motorista nga mohatag og taas nga pasensiya. (/BDB)(BANATNEWS)
- Latest