11 positibo sa drug test

CEBU, Philippines — Onse ka mga empleyado sa Parks and Playgrounds ug mga kawani sa Barangay Lusaran, sa Dakbayan sa Sugbo ang nagpositibo sa ginadili nga drugas atol sa gipahigayon nga kinalit nga drug test sa mga tinugyanan sa Cebu City Office on Substance Abuse Prevention (COSAP) nga gipangulohan sa ilang labaw Jonah John Rodriguez.

Matud ni Rodriguez ang mga nagpositibo nga 11, ang duha niini gikan sa Parks and Playgrounds ug siyam gikan sa Barangay Lusaran.  Tan-awon pa usab kun adunay naapil niini nga mga drug surrenderees.

Sumala pa ni Rodriguez ang mga nagpositibo sa drug test kinahanglang pang makompirmar pinaagi sa laing confirmatory test nga himuon.

Si Rodriguez nitug-an ang mga napaubos na nila sa drug test nga adunay nagpositibo mao ang Department of General Services, Prevention Restoration Orderly Beautification Enhancement, Office of the Civil Registrar ug Market Authority.

Atol ning pagbalita, ang COSAP napahigayon og drug test sa mga tinugyanan sa Cebu City Jail Female Dorm subay sa hangyo usab sa warden sa maong pasilidad. (/IBM)(BANATNEWS)