Gov. mag-ocular inspection sa Camotes

CEBU, Philippines – Gikatakda nga mohimo og ocular inspection si Gobernador Gwendolyn Garcia sa Isla sa Camotes alang sa pagpalambo sa airport niini. Karong Nobiyembre 25 ang gikatakdang pagbisita ni Garcia ngadto sa Camotes ug gidapit niya ang opisyales sa Mactan Cebu International Airport Authority (MCIAA) aron mokuyog niya sa maong inspeksiyon.

Si Garcia nakigtagbo kini sa mga opisyal sa MCIAA karong semanaha gipangulohan sa general manager nga si Steve Dicdican. Ang 22 ka ektarya nga luna nga gipanag-iya sa Kapitolyo nga anaa sa Lungsod sa San Francisco, Isla sa Camotes maoy buot ipa-develop ni Garcia ug ipa-operate pinaagi Public-Private Partnership (PPP) sama sa airport sa Bantayan.

Buot ni Garcia nga mapalambo ang mga airport sa duha ka isla aron nga mas molambo usab ang ekonomiya niini ug magamit sa maong tugpahanan panahon kon adunay emerhensiya hilabina kong dili makabiyahe diha sa dagat.

Ang mga isla sa Camotes ug Bantayan maoy mga isla nga dagsaanan sa mga turista sa Lalawigan sa Sugbo. (/BDB)(BANAT NEWS)