18 kawani sa CH positibo sa drug test
CEBU, Philippines – Moabot sa 18 ka empleyado sa Cebu City Hall ang positibo sa paggamit sa ginadiling drugas human sa surprise drug test nga gipahigayon sa Cebu City Office on Substance Abuse Prevention nga gisugdan niadtong Lunes.
Matud pa sa hepe sa COSAP, Jonah John Rodriguez, nga upat ka buhatan ang ilang napaubos sa drug test nga naglangkub sa Department of General Services, Prevention Restoration Orderly Beautification Enhancement, Market ug ang Office of the City Civil Registrar.
Ang 18 nga nagpositibo mao ang duha sa DGS, 10 sa PROBE diin walo ang positibo ug duha ang niangkon atol sa drug test nga nakagamit og drugas, lima sa Market ug usa sa OCCR.
Matud ni Rodriguez nga ipasa nila ang report ngadto sa City Legal Office ug sila na ang moduso sa rekomendasyon ngadto sa buhatan ni Mayor Edgardo Labella.
Magpaabot usab sila sa resulta sa confirmatory test sa mga nagpositibo sa drug test. (/GMR)(BANAT NEWS)
- Latest
