Lapu-Lapu nagpasiga na sa suga sa Pasko

CEBU, Philippines – Gipasiga na ang mga suga sa Pasko sa Dakbayan sa Lapu-Lapu niadtong Lunes sa gabii.

Dungan kini sa pagsugod na sab sa nobenaryo sa kapistahan sa Birhen sa Regla karong Nobiyembre 20 ug 21.

Si Mayor Junard “Ahong” Chan maoy nangulo sa kalihukan sa may estatuwa ni Lapu-Lapu nga gituyo sa pagpahimutang sa eskina sa dalan sa Mactan Cebu International Airport ug Mactan Export Processing Zone sa Barangay Pusok.

Si Chan nga nahinabi sa mga tigbalita niingon nga ilang gihatagan og kamahinungdanon sa pagsaulog sa Pasko karong tuiga ang pagpangandam sa ika-500 ka tuig nga sumad sa Gubat sa Mactan sa 2021 nga ang ihap sa 500 ka adlaw hangtud sa kasaulogan magsugod sa Disyembre 14.

Ang kagamhanan sa dakbayan nigahin sab og P500,000 alang sa pagpahimutang sa kadalanan sa 500 ka Christmas Tree nga gipahaum gihapon sa ika-500 ka tuig nga kasumaran sa Gubat sa Mactan.

Samtang gipahibawo ni Cebu Archbishop Jose Palma nga ang kasaulogan sa ika-500 ka tuig sa Kristiyanismo sa Sugbo sa 2021 magpadayon gihapon bisan dili motambong si Presidente Rodrigo Duterte.

Sumala pa ni Palma nga importante man ang presensya sa Presidente apan dili makapahunong sa selebrasyon.

Ang pamahayag sa Arsobispo tubag sa pamahayag ni Duterte nga dili angay iselebrar ang “500 years” nga kalihukan sa Kristiyanismo.

Si Palma nitug-an nga magpadayon ang mga giandam nga kalihukan sa Archdiocese of Cebu uban sa pagpakig-alayon sa Catholic Bishop Conference of the Philippines.

Karong adlawa ilusad ang countdown sa dakung kalihukan diin usa ka Santos nga Misa nga dumalaon sa Apostolic Nuncio to the Philippines Archbishop Gabriela Giordano Caccia, DD sulod sa Basilica Minore Del Sto. Niño, nga sugdan sa usa ka conference ug tapuson sa usa ka konsyerto.

Andam na ang Cebu City Police Office sa paglusad sa mga kalihukan sumala pa ni CCPO officer-in-charge, Police Colonel Geovanie Maines.

Gilauman nga mokabat sa kapin 6,000 ka deboto ang motambong sa kalihukan sa Basilica Minore del Santo Niño karong adlawa.

Sugdan ang pagsirado sa kadalanan palibot sa simbahan ala una sa hapon.

Matud ni Maines nga temporaryo una nga pagawason ang mga tawo sa simbahan sa dili pa ang ala una sa hapon.

Makig-alayon ang kapolisan sa simbahan kung kinsa lang ang mga personalidad ang mahabilin. (/GMR)(BANAT NEWS)