Talisay police nakadawat og award

CEBU, Philippines — Nag-una ang Talisay City Police Station sa tibuok Probinsiya sa Sugbo nga may labing kadaghan nga nadakpan nga mga kriminal sulod niadtong Oktubre 28 hangtud 30.

Si Police Major Gerard Ace Pelare, hepe sa TCPS, maoy nidawat sa pasidungog sa Cebu Provincial Police Office.

Niabot sa 60 ka kriminal ang nasikop nga adunay lainlaing kalapasan. Gihimo ang operasyon pinasikad sa warrant of arrest, pagpangronda sa ilegal nga sugal ug drugas.

Gani ang maong operasyon maoy nagtukmod nga nahimong malinawon ang kalag-kalag diin walay bisan usa nga natala nga kagubot sulod sa mga sementeryo sa dakbayan.

Nagpasalamat si Pelare sa tanan nga nitabang aron ilang makab-ot ang kalampusan. GMR (BANATNEWS)