9 pusher sikop sa Lapu-Lapu, Cordova

CEBU, Philippines — Nasikop ang siyam ka pusher og shabu sa sunod-sunod nga buy-bust operation sa mga sakop sa City Intelligence Branch sa Lapu-Lapu City Police Office ug duha ang nasikop sa kapolisan sa Lungsod sa Cordova.

Si Police Lieutenant Colonel Mark Gifter Sucalit, hepe sa CIB sa LLCPO, niila sa mga nadakpan nga sila si Junry Tajo, 39, habal-habal driver nga taga Barangay Pajo sa maong siyudad; Ildefonso Angana, 28, taga Barangay Apas, Dakbayan sa Sugbo ug Patricio Compacion, 36, taga Barangay Pusok.

Laing nadakpan mao sila si Hilarion Morales Jr., 29, taga Pakpaka, Barangay Basak, Dakbayan sa Lapu-Lapu; Johnroy Bamboa, 25, Carl Ohagan, 19, ug Criker Say-a, 29, pulos taga Sitio Eskuwelahan, Barangay Buhisan, Dakbayan sa Sugbo.

Si Sucalit niingon nga mokabat sa P110,000 nga kantidad sa shabu ang kinatibuk-an nga nasakmit gikan sa mga dinakpan, usa ka Honda nga motorsiklo nga walay plate number ug mokabat sa P3,000 nga salapi lakip ang buy-buy bust money.

Samtang sa buy-bust operation sa Cordova Police Station nga gipangulohan sa ilang hepe nga si Police Lieutenant Ace Alcid Layud maoy nadakpan ang duha ka pusher sa Sitio Bliss, Barangay Ibabao sa maong lungsod.

Nailhan ang mga dinakpan nga sila si Evan Ponce, 29, ug Richfield Paras Uy, 29, pulos nagpuyo sa maong dapit ug nasakmit gikan kanila ang mokabat sa P9,000 nga kantidad nga shabu ug buy-bust money. GMR (BANATNEWS)