DTI-7 giawhag nga mosusi sa Christmas lights nga gipamaligya
CEBU, Philippines — Giawhag sa konseho sa Dakbayan sa Mandaue ang buhatan sa Department of Trade and Industry (DTI) nga mohimo og higpit nga pagsusi sa mga gibaligya nga Christmas light aron sa paglikay sa sunog niining panahon sa pasko.
Ang konseho sa siyudad niaproba kini sa resolusyon nga gipangamhanan ni Konsehal Jimmy Lumapas kabahin sa maong awhag ug mopadala sila og kopya niini ngadto sa buhatan ni Mayor Jonas Cortes ug sa DTI-7.
Si Lumapas nipasabot nga niining panahon nga nagkaduol na ang pasko ang mga tawo mamalit kini og mga dekorasyon alang sa pasko lakip niini ang Christmas lights. Ug mahinungdanon nga ang DTI mohatag og kasiguroan ngadto sa publiko nga ang gibaligya nga mga Christmas light dili kini mga substandard.
Kini masuta pinaagi sa pagbutang og marka isip timailhan nga ang Christmas lights nasusi na kini sa DTI ug nakapasar sa Bureau of Philippines Standard (BPS) ug Philippine Standard (PS) licenses ug ingon man sticker nga Import Commodity Clearances (ICC) nga nagpasabot napaubos na kini sa higpit nga pagsusi sa DTI ug luwas nga gamiton. Sa nasayran nga ubos sa Akta Republika No. 7394 kun “Consumer Act of the Philippines” gimando nga ang DTI mopahamtang og silot sa mga magpapatigayon nga masakpan nga nagbaligya og uncertified Christmas lights. Subay sa natala sa maong buhatan nga sa Septiyembre 30 niining tuiga anaa lang sa 171 ka Import Commodity Clearances (ICC) Certificates ang gitugotan alang sa pagbaligya og certified Christmas lights dinhi sa nasud. BDB (BANATNEWS)
- Latest