CCSGB maoy magdumala sa kalihukan sa Sinulog 2020

CEBU, Philippines — Giklaro sa Cebu City Sinulog Governing Board (CCSGB) nga sila ang responsable sa kinatibuk-ang pagpangandam alang sa selebrasyon sa Sinulog 2020.

Atol sa gipahigayong tigom kagahapon ang executive director sa CCSGB Barney Boja nagkanayon nga ang governing board nakig-alayon sa Sinulog Foundation Inc. (SFI).

Samtang si Kenneth Cobonpue, miyembro sa CCSGB nagkanayon nga ang SFI ang responsable sa pundo alang sa Sinulog.

Matud ni Cobonpue nga ang mga kalihukan nga giandam sa nagdumala sa board dili kinahanglan aprobahan sa SFI.

Ang CCSGB giingong maoy magsilbing regulatory board nga magbantay sa SFI ug sa executive committee ug adunay katungod nga susihon ug aprobahan ang tanan nga mga resolusyon ug mga aksiyon sa executive committee sa SFI.

Sukwahi kini sa pamahayag ni Bise Mayor Michael Rama, kanhi chairman sa SFI nga ang tanang kalihukan nga gipresentar sa CCSGB alang sa Sinulog kinahanglan aprobahan sa SFI. Matud sa opisyales sa CCSGB nga ang pagbiya ni Rama dili makaapekto sa mga pagpangandam alang sa Sinulog 2020 tungod kay sila adunay hingpit nga suporta ug koordinasyon sa SFI ug sa executive committee.

Sa iyang bahin, si CCSGB project director Val San Diego nagkanayon nga ang short film contest dili nila tangtangon.

Matud ni San Diego nga ang governing board nakadesisyon sa pagdugang sa vlogging aron aduna kini kalabutan sa bag-ong henerasyon ug aron madani ang daghang mga international vlogger.

Kahinumduman nga daghang netizen ang nipadayag sa ilang kasagmuyo human sa gipahibalo sa governing board sa ilang tigom niadtong Oktubre 24 nga ang short film contest pulihan og vlogging.

Ang bag-ong kalihokan sa Sinulog naglakip sa Sinulog sa Palaboy; Drum the Beat, Beat the Drum; Sinulog Market Street Fair; Entertainment gikan sa National TV stations ngadto sa Cebu City Sports Center, Plaza Independencia ug Fuente Osmeña; Highlight on Pintados; ug family oriented activities sama sa Family Strong Man ug Duathlon. BDB (BANATNEWS)