Gi-drug test niangkon, buot mosuborno

CEBU, Philippines — Usa ka kawani sa Cebu City Hall ang buot unta mosuborno sa nagpahigayon og kinalit ga drug test kagahapon samtang laing usa niangkon nga nakagamit kini og ginadiling drugas.

Dul-an sa 150 ka empleyado sa Department of General Services ug sa Prevention Restoration Orderly Beautification Enhancement ang gipaubos sa kinalit nga drug test sa Cebu City Office on Substance Abuse Prevention.

Ang hepe sa COSAP, Jonah John Rodriguez, niingon nga sa wala pa ang drug test iyang giawhag ang mga kawani nga moangkon nalang kung adunay nakagamit.

Gibutyag ni Rodriguez nga adunay usa ka trabahante ang niduol kaniya ug niangkon sayo sa buntag kagahapon nga nakagamit siya og drugas.

Matud ni Rodriguez nga ang usa nga nisuway og bayad giingong  duha ka higayon nga bugnaw ang ihi nga gisumiter.

Nagduda ang naghimo sa drug test hinungdan nga gisusi ang trabahante ug adunay plastic nga gibutangan og tubig samtang nabasa sab ang pundiyohan niini.

Ang COSAP moduso og report sa City Legal Office labot sa kinalit nga drug test diin dunay niangkon ug nisuway pagsuborno kanila. GMR (BANATNEWS)