Baragay, Sangguniang Kabataan polls gisibog sa 2022

CEBU, Philippines —  Ang Ubos Balay Balauranan miaprubar kagahapong adlawa sa ikatulong pagbasa sa House Bill No. 4933 nga nagtinguhang isibog ang gikatakda untang Barangay ug Sangguniang Kabataan (SK) Elections sa sunod tuig 2020 ngadto na sa Disyembre 5, 2022.

Nibotar pabor sa pagsibog sa petsa ang 194 ka magbabalaud samtang unom lang ang wala mobotar. Walay ni-abstain sa botasyon sumala pa sa report nga gikutlo gikan sa Rappler.Com.

Tungod kay parehas ra og bersyon ang HB 4933 sa Senate Bill nga gipasar sab sa Senado niadtong Oktubre dili na kini moagi sa bicameral committee, diretso na kini papirmahan kang Pres. Duterte.

Si Duterte daan nang nipadayag sa iyang state of the nation address nga gusto niyang masibog ang maong eleksyon.

Ang 2020 Barangay, SK polls giandaman og P5.77 bilyones sa Commission on Elections.

Mao na kini ang ikatulong pag-uktaba sa Barangay ug SK elections ubos sa administrasyong Duterte. IBM (BANATNEWS)