P1.6 Milyones shabu, 15 ka tawo sikop

Cebu, Philippines —Kapin P1.6 milyon nga balor sa gidudahang shabu ug 15 ka mga tawo apil ang usa ka kanhi seminarista ang nasakmit sa managlahing buybust operations sa kapulisan dinhi sa Metro Cebu.

Sa operasyon diha sa Barangay Cogon- Ramos ug Barangay Carreta sa Dakbayan sa Sugbo nadakpan sa mga sakop sa Abellana Police Station inubanan sa Philippine Drug Enforcement Agency-7, Regional Special operations group 7, ug Regional Intelligence Division diha sa may V. Ranudo St. Barangay Cogon- Ramos ang managhigalang sila John Angelo Lacbayo ,25, ug si Gemlou Ubalde ,22.

Nakuhaan silang duha og walo ka mga dagkong putos nga gidudahang shabu nga mokantidad og kapin P1.3 milyon. Suma pa ni Police Major Edward Sanchez, ang hepe sa Abellana Police Station high value targets ang duha ug sakop sa dakong drug group.

Sunod nadakpan sud sa Ludo Cemetery sa Barangay Carreta si Alendri Holero Magdasal,26, taga Barangay Lorega- San Miguel nga nakuhaan og tulo gagmay ug duha ka mga medium sized nga paketeng shabu nga mobalor sa kapin P300 mil sa grupo sa Mabolo Police Station 4 pinangulohan ni Police Major Dindo Alaras.

Laing nadakpan sa Sitio Panay, Brgy. kasambagan si Christian Noel Abelgas, 31 taga Kasuntingan sa Dakbayan sa Mandaue nga nakuhaan og duha ka gramong gidudahang shabu.

Siyam sab ka tawo ang nadakpan sa mga sakop sa City  Intelligence  Branch  (CIB)  ug City  Drug Enforcement  Unit (CDEU) sa Dakbayan sa Lapu-Lapu pinangulohan ni Police Captain  Percival Miascodiha sa Sitio  Pool,  Barangay  Bankal.

Samtang duha sab ang nadakpan sa operasyon sa kapolisan sa Dakbayan sa Talisay diha sa Abores St., Barangay Bulacao, Dakbayan sa Talisay niadtong Huwebes sa gabii.

Ang nasikop mao si Gabriel Reyes Ong, 27, nga nakuhaan og 13 ka gagmay nga pakite sa shabu ug buy bust money nga P200. Sunod nadakpan si Bernardo Delfin, 57, kinsa nakuhaan og 26 ka gagmay nga pakete ug usa ka dakong putos nga pulos dunay sulod nga gidudahang shabu ug ang buy bust money.

Nasuta nga igsuon si Delfin sa usa ka non-uniformed personnel nga nadestino sa Cebu Provincial Police Office (CPPO). Ang managsuon usa ra og gipuy-ang balay maong giapil sa pagsusi kun nalambigit ba usab kini sa drugas. IBM ( BANAT NEWS)