LTFRB mopitol sa trip cutting nga PUJ
CEBU, Philippines — Moabot sa 50 ka public utility jeepneys sa Dakbayan sa Talisay nga nadakpan sa trip cutting ang i-endosar ngadto sa Land Transportation Franchising and Regulatory Board.
Ang City of Talisay-Traffic Operation Development Authority nanakop sa mga drayber nga nagsige og trip cutting.
Si Jonathan Tumulak, hepe sa CT-TODA, nagkanayon nga nagkaestorya na sila ni Mayor Gerald Anthony “Samsam” Gullas Jr. ug sa direktor sa LTFRB-7 nga si Eduardo Montealto.
Si Tumulak niingon nga ang LTFRB-7 nalang ang mopitol sa mga drayber sa PUJ nga padayon nga nag-trip cutting.
Bisan kalapasan sa drayber, ang operator ang ipatawag aron pamultahon og P5,000.
Ang mga trip cutting kasagaran nadakpan sa Barangay Tabunok ug Bulacao nga mga biyahe sa Minglanilla, Siyudad sa Naga ug San Fernando.
Daghan ang reklamo nga niabot sa buhatan ni Gullas labot niini hinungdan nga nihimo og operasyon ang CT-TODA. GMR (BANAT NEWS)
- Latest
