CHR moimbestigar sa kamatayon sa mga tulisan

CEBU, Philippines — Ang Commission on Human Rights 7 mohimo og motu propio investigation human nakadawat og direktiba gikan sa ilang ulohan nga buhatan nga paimbestigahan ang kamatayon sa upat ka mga nangadakpang tulisan didto sa Dakbayan sa Bogo niadtong Sabado sa gabii.

Si CHR7 Chief Investigator Leo Villarino nga nahinabi sa Banat News miingon nga tungod sa kamanduan nga ilang nadawat maghimo sila sugod karong adlaw nga Miyerkules sa ilang motu proprio investigation.

Sumala pa ni Villarino, mangayo sila og mga dokumento gikan sa kapulisan lakip usab ang pagbisita sa lugar kung diin giingong nahitabo ang giingong pagsukol sa mga suspetsado.

Ang mga nakalas nga gituohang sakop sa grupo sa mga tulisan nga nakabase sa ozamis city mao sila si Kevin Andales, Wilfredo Enguito, Philip Faburada ug Glen Tairos.

Giingong ang upat pulos nisuway og sukol sa mga polis maong sila nangapusilan.

Ang Deputy Regional Director for Administration Police Col. Ildibrandi Usana miingon nga bukas sila sa himoon nga imbestigasyon sa  CHR-7.

Gimandoan usab niya ang mga polis nga nalambigit sa pagsikop ug maoy nakapusil sa mga suspek sa pagkooperar sa CHR-7. (BANAT NEWS)