Kapolisan gipasalamatan ni Samsam
CEBU, Philippines — Daku ang kalipay ni Talisay City Mayor Gerald Anthony “Samsam” Gullas Jr. sa malampuson nga kapistahan niadtong Oktubre 15.
Usa sa iyang gipasalamatan ang kapolisan nga walay puas sa pagmintinar sa kahapsay ug kalinaw sa matag adlaw ug gabii nga kalihukan.
Gawas sa kapolisan, iya sab nga gipasidunggan ang mga force multiplier ug ubang sektor nga nitabang sa tanang kalihukan.
Matud ni Gullas nga daku ang papel sa kapolisan sa bisan unsa nga kalihukan maong angay sila hatagan og igong pagpasalamat ilabi na nga walay mga dagkung panghitabo nga nitumaw atol sa pagdagsa sa katawhan sa siyudad aron sa pagsaulog sa kapistahan ni Sta. Teresa de Avila.
Nanghinaut sab ang mayor nga ipadayon sa kapolisan ang ilang maayong buhat sa bag-ong liderato ni Police Major Gerard Ace Pelare.
Si Pelare sa iyang bahin gidawat ang dakung hagit ug maningkamot pa nga ilang mahimo ang gilauman sa katawhan.
Ang pagpitol sa tanang matang sa ilegal ang ilang target aron makita sa katawhan nga sila seryuso sa ilang trabaho. (/GMR)(BANATNEWS)
- Latest
