Pagsangyaw 2021 gilusad sa Bantayan

CEBU, Philippines — Nikabat sa 300 ka layko ug magsasangyaw sa pito ka parokya sa Bantayan Island ang nitambong sa paglusad sa Pagsangyaw 2021 Season 2 ug 3 sa maong isla.

Ang mga nitambong sa mga kalihukan nagagikan sa parokya sa St. Peter and St. Paul Bantayan Island nga maoy host parish, Sacred Heart of Jesus Parish sa Tangkong; Sto. Niño Parish sa Sta. Fe; St. Francis de Assisi Parish sa Madridejos; San Vicente Ferrer Kampinganon; Immaculada Concepcion Parish sa Madridejos ug San Isidro Labrador.

Sa wala pa gilusad ang Season 2 ug 3 gipahigayon una ang pagpasabot ug orientation may kalabutan sa kalihukan sa Pagsangyaw 2021 sa district coordinator nga si Dave Deriada.

Gipaambit usab ni Lomas coordinator ug kasamtangan nga vice chairman sa Commission on the Laity, Reynald Andales, ang may kalabutan sa paghigugma sa Ginoo ug ang pagserbisyo.

Human sa pagpaambit gisunod dayun ang paglusad sa Season 2 nga gipasiugdahan ni Archbishop Jose Palma ug gisundan sa  Season 3 kung diin ang mga Jubilarian nga kaparian sa Archdiocese of Cebu mao na usab ang mopaambit nga matapos sa Disyembre 15.

Ang mopaambit sa Season 3 naglangkub nila ni Bishop Dennis Villarojo kinsa mao ang Obispo sa Malolos, Bulacan; Msgr. Ruben Labajo, team moderator sa Balamban Parish; Msgr. Roger Fuentes, team moderator sa San Nicolas Parish; Msgr. Marnel Mejia ug Msgr. Tony Medida sa St. Joseph Parish sa Mandaue City. Nipaambit usab sa iyang pasalamat ang chairman sa Commission on the Laity nga si Fe Mantuhac-Barino sa kadasig sa mga layko sa paglusad sa Pagsangyaw 2021.

Adunay mga layko usab ang nagpaambit sa ilang mga kasinatian ilabi na may kalabutan sa pagpaambit sa Pulong sa Ginoo.

Ang maong kalihukan gitapos lang sa tunga sa adlaw diin gipaambit usab ni Fr. Nick Ramos sa St. Peter and Paul Parish ngadto sa mga magsasangyaw ug nanambong nga unahon sab nila pagsangyaw ug pagdapit ang ilang mga tagsa-tagsa ka pamilya ug aduna silay mga kabag-ohan ug kalig-on sa ilang pagtuo ilabi na pipila nalang ka tuig moabot ang ika-500 ka tuig sa Kristiyanismo sa nasud nga nagsugod sa Sugbo. (/GMR)(BANATNEWS)