Tuition fees sa Paglaum

Cebu, Philippines- Ang kagamhanan sa Probinsiya sa Sugbo mobayad sa tuition fees sa mga scholar sa Paglaum Scholarship Program nga graduating ug ni-graduate ug aduna pay balance sa tuition.

Gipatawag ni Gobernador Gwendolyn Garcia ang school registrar sa mga eskwelahan diin na-enroll ang mga scholar aron masuta pila ang bayaran sa probinsiya.

Samtang sa mga state college ug unibersidad dili na mobayad ang Kapitolyo tungod kay libre na man ang tuition fees.

Matud ni Garcia nga bayaran sa Kapitolyo ang P10mil nga subsidy ngadto sa mga pribadong eskwelahan sa mga graduating nga tinun-an alang sa first semester karong tuiga apan sa second semester dili na mobayad ang Kapitolyo.

Dili na usab mohatag pa ang Kapitolyo og P1,500 nga binuwan nga allowance sa maong mga scholar.

Ubos sa ordinansa nga naggama sa Paglaum Scholarship Program nga ang kwalipikado sa maong programa kadtong mga tinun-an nga biktima sa pang-abuso, wala nay ginikanan, mga kabus ug uban pa.

Ang maong mga scholar wala kini maintain nga average sa grado basta makapasar lang.

Apan matud ni Garcia nga pundo sa gobiyerno ang gigasto ug angayan lang nga adto kini magahin sa mga "deserving" nga mga tinun-an.

Ang Kapitolyo adunay bag-ong scholarship program nga gigama nga mao ang Cebu Province Grants Intended for Tertiary Students (CPGIFTS) nga usa ka scholarship program diin ang dawaton niini mao ang mga tinun-an nga mo 1st-year college ug kinahanglan kini nga magmentinar og 85 porsyento nga  grado nga 85%.