13 ka high-powered firearms nasakmit

Trese ka mga nagkadaiyang high-powered firearms ug mga bala ang nasakmit sa hiniusang operasyon sa mga sakop sa Naval Forces Central ug Cebu City Police Office niadtong Huwebes, Oktubre 17, sa bukirang mga barangay sa Dakbayan sa Sugbo.

 Atol sa operasyon, 13 sab ka tawo nga naghupot sa maong mga armas ang gisikop sa City Mobile Force Company Forward Patrol Base diha sa Barangay Pung-ol alang sa dugang imbestigasyon.

Ang mga nasakmit nga mga armas gituohang nahabilin sa rebeldeng New Peoples Army niadto pang 1980s ug sayong bahin sa 2000 samtang ang grupo naglihok pa dinhi sa Sugbo.

Gawas sa 13 ka mga tag-as nga armas, duna say nasakmit nga 17 ka nagkadaiyang mga pistola ug rebolber, mga klase-klaseng bala, ug mga magasin ang nakuha sa maong operasyon.

Ang 13 ka tag-as nga kalibreng armas naglakip sa M16A1 Colt assault rifle; M2 Carbine automatic rifle ug usa ka walay sulod nga magasin; Ingram (mini-submachine pistol) ug upat ka cal. 25 parabellum nga mga bala; M1917 Redstone .30 bolt action sniper rifle ug 15 ka bala niini ; M1917 Remington cal. 30 bolt action sniper rifle ug ug lima ka bala niini; M4 Carbine automatic rifle ug lima ka mga bala niini; M1917 Remington cal.7.62 mm bolt action sniper rifle ug upat ka mga bala; Springfield cal. 30 M1 Garand rifle nga dunay duha ka clips nga puno og bala; duh aka improvised shotguns ug unom ka bala niini; M2 Carbine automatic rifle nga dunay magazine ug sulod nga upat ka bala; AK-47 assault rifle ug 25 ka bala niini; laing improvised shotgun (sumpak) nga adunay usa ka bala; siyam ka .38 caliber revolvers, lima ka .38 caliber revolver (snub-nose) ug siyam ka bala sa .38 caliber, usa ka.22 caliber black widow revolver nga dunay sa upat ka bala; usa ka improvised pistol nga adunay bala; usa ka.45 caliber pistol nga adunay lima ka bala.

Ang maong mga armas dad-on sa Regional Crime Laboratory Integrated Ballistic Identification System (IBIS) alang sa beripikasyon. Si Naval Forces Central Public Affairs Officer Neil Rafael Ybera sa Central Command miingon nga padayon ang ilang pagpaniid ug pagbantay alang sa seguridad sa Kabisay-an.