Wala gipa-exam kay wala ka bayad sa amotan?

CEBU, Philippines — Giawhag sa Department of Education (DepEd) ang mga ginikanan nga mosumbong ngadto sa mga division office kong aduna sila’y mga reklamo batok sa mga magtutudlo.

Kini human sa taho batok sa usa ka maestra sa Aloguinsan Central Elementary School nga giingong wala tugoti nga maka-take og examination ang tinun-an tungod kay giingong wala mobayad og P50 alang sa pintal sa plant box.

Base sa DyLA Newsbreak page, giingong ang magtutudlo nangatarongan nga gikasabotan ang maong bayranan tali sa mga ginikanan diin aduna kini deadline.

Gikataho nga ang maong magtutudlo nagpaamot og P100 alang sa paghinlo sa classroom matag school year ug P15 matag bulan alang paglimpiyo gihapon sa classroom.

Si Amaryllis Villarmia, tigpamaba sa DepEd Central Visayas nagkanayon nga walay problema sa amotan kon nauyonan kini sa tanang ginikanan ug magtutudlo apan dili mamahimo nga mamugos ang maestra.

Matud ni Villarmia nga ang DepEd division kon asa ubos sa pagdumala ang maong tunghaan maoy mohimo og imbestigasyon sa maong insidente.

Base usab sa report sa dyLA radio nga ang school principal sa maong tunghaan nipatawag sa maestra ug sa ginikanan sa bata.

Giingong gihimakak sa magtutudlo ang pasangil batok kaniya ug matud niini nga ang inahan maoy nikuha sa bata sa classroom hinungdan nga wala kini makaapil sa exam.

Apan giingong niangkon usab ang maong maestra sa nahisgutang kalapasan ug nangayo og pasaylo. (BANAT NEWS)