Bag-ong hepe sa PRO7: Internal cleansing magpadayon

CEBU, Philippines — Hingpit nang niasumir isip bag-ong director sa Police Regional Office 7 si Police Brigadier General Valeriano De Leon, hulip ni outgoing Police Brigadier General Debold Sinas kinsa mao na karon ang mangulo sa National Capital Region Police Office (NCRPO).

Ang seremonyas gihimo sulod sa PRO- 7 Ground sa Camp Sergio Osmeña Sr., sa Dakbayan sa Sugbo kagahapon sa buntag nga gitambongan sa gitudlong officer-in-charge sa PNP Police Lt. Gen Archie Francisco Gamboa nga nihulip kang kanhi PNP Director General Oscar Albayalde nga mi-resign.

Si Albayalde mikanaog sa pwesto tungatunga sa kontrobersiya sa “Ninja cops” nga diin 13 niya ka mga sakop kaniadto sa Pampanga Provincial Police Office ang giingong mi-recycle og kapin 100 ka kilong shabu, butang nga iyang gihimakak.

Sama sa gipaabot, si De Leon mimando na karon sa Regional Internal Affairs Service-7 pagsuta sa tanang mga personnel sa PRO-7 nga adunay mga giatubang nga mga kaso ilabi na kadtong nalambigit sa illegal nga drugas.

Si De Leon miingon nga dili mamahimong epektibo ang pakiggubat batok sa illegal nga mga kalihukan kung diha sa han-ay sa kapulisan adunay problema tungod kay dunay mga badlungon. Gisaad ni De Leon nga ipadayon gihapon niini ang mga programa nga gisugdan ni Sinas, apan adunay siyay ipuno nga mga kabag-ohan.

Apil na niini ang pagpadayon sa ilang internal cleansing, all-out war batuk sa ginadili nga drugas, kriminalidad ug kurapsyon.

Gikatakdang makigkita si De Leon sa iyang intelligence community aron iyang masayran ang sitwasyon dinhi sa Central Visayas. Tinguha niya nga putlon ang tinubdan sa ginadili nga drugas. Giklaro niya nga dili padaghanay og nasakmit nga drugas ang iyang tumong kay sa iyang tan-awon murag wala gihapon mahubas ang illegal nga drugas dinhi sa Central Visayas bisan paman sa paningkamot sa iyang gisundang director. Sa pikas bahin, si Gamboa nipahinumdom sa kapolisan nga seryusong sundon ang direksyon ni Presidente Rodrigo Duterte may kalabutan sa gubat batok sa illegal nga drugas ug internal cleansing sa kapolisan. (BANAT NEWS)