Amerkano na ‘hit and run’
CEBU, Philippines – Nalandig sa tambalanan ang usa ka langyaw human giingong na-hit and run sa Barangay Lagtang, Dakbayan sa Talisay atol sa adlaw sa kapistahan sa siyudad.
Ang langyaw nailhan nga si Daniel Morris Wilton, 50-anyos, nga usa ka American national.
Si Patrolman Kim John Amolo sa Lawaan 1 Police Precinct nibutyag nga nadawat nila ang taho labot sa langyaw nga nagkadugo ang dagway.
Apan sa inisyal nila nga pakisusi wala pay bisan usa ka tawo nga nitug-an kanila nga na-hit and run gyud ang maong langyaw.
Giingong nagmaneho kini sa iyang Yamaha Aerox ang langyaw sa dihang nakasugat og disgrasya.
Gidala sa tambalan si Wilton human nakaangkon og samad sa iyang nawong.
Si Amolo nidugang nga ila pa nga gisubay ang lugar nga nahitaboan aron sa pagkuha og dugang impormasyon labot sa unang taho nga ilang nadawat nga na-hit and run ang biktima. (/GMR)(BANAT NEWS)
- Latest